Sigmundur Davíð Gunnlaugsson forsætisráðherra lýsti því yfir á leiðtogafundi Sameinuðu þjóðanna um helgina að Ísland hefði skuldbundið sig til að draga úr losun gróðurhúsalofttegunda um 40% fyrir árið 2030.
Nú er hins vegar komið í ljós að óvissa ríkir um aðgerðir Íslendinga hvað þetta varðar, en ekki er frágengið hvað stjórnvöld hér á landi munu ganga langt í að draga úr losun lofttegundanna.
Á fundi hjá Sameinuðu þjóðunum nefndi forsætisráðherra þá tölu sem lönd víðsvegar um heimi hafa að hámarki ákveðið að draga úr mengun, en Sigrún Magnúsdóttir, umhverfisráðherra hefur hafnað því opinberlega að endanleg ákvörðun hafi verið tekin um hve mikið Ísland muni draga úr losun gróðurhúsalofttegunda.
Jóhannes Þór Skúlason, aðstoðarmaður Sigmundar Davíðs sagði í samtali við mbl.is að Sigmundur hafi ekki meint að Ísland muni draga úr útblæstri gróðurhúsalofttegunda um 40% heldur hafi hann verið að vísa til markmiða Evrópusambandsríkjanna um að heildarminnkun losunarinnar verði 40% fyrir árið 2030. Ísland muni taka við \"sanngjörnu hlutfalli“ af þessari heildarminnkun.
