Sigmundur davíð: „telji menn að með því að samþykkja orkupakkann í dag sé málið frá er það mikill misskilningur“

Sigmundur Davíð Gunnlaugsson, formaður Miðflokksins, segir að þó svo að innleiðing þriðja orkupakkans verði samþykkt á Alþingi í dag sé málið alls ekki búið. Atkvæðagreiðsla vegna málsins fer sem kunnugt er fram í dag og hefst klukkan 10:30. Talið er næsta öruggt að innleiðingin verði samþykkt. Eyjan greinir frá.

„Telji menn að með því að samþykkja orkupakkann í dag sé málið frá er það mikill misskilningur. Þá væri það fyrst að byrja fyrir alvöru,“ segir Sigmundur Davíð í pistli í Morgunblaðinu í dag.

Frosti Sigurjónsson, talsmaður Orkunnar okkar, tekur í sama streng í samtali við Morgunblaðið í dag. Greint hefur verið frá því að samtökin, sem hafa barist gegn innleiðingunni, hyggist í dag afhenda Steingrími J. Sigfússyni, forseta Alþingis, undirskriftir með áskorun um að hafna þriðja orkupakkanum. Segir Frosti að 16.700 undirskriftir hafi safnast.

„Bar­átt­an fyr­ir fullu for­ræði Íslend­inga yfir eig­in orku­mál­um held­ur áfram. Orkupakkinn tek­ur ekki gildi nema for­set­inn samþykki hann. For­set­inn ger­ir samninga við er­lend ríki sam­kvæmt 21. gr. stjórn­ar­skrár­inn­ar. Við mun­um skora á for­set­ann að fall­ast ekki á þetta og höf­um birt hon­um slíka áskor­un. Það er næsta skref,“ segir Frosti.

Fullyrðingar hans um að forseti Íslands þurfi að samþykkja þriðja orkupakkann standast þó ekki þar sem 21. grein stjórnarskrárinnar tekur til milliríkjasamninga, en þriðji orkupakkinn telst ekki til milliríkjasamninga. Auk þess er þriðji orkupakkinn þingsályktunartillaga, ekki lagafrumvarp, og því þarf forseti Íslands ekki að samþykkja hana samkvæmt 26. grein stjórnarskrárinnar, sem kveður á um að forseti staðfesti lagafrumvörp sem Alþingi hefur samþykkt.

Frosti bætir því við að gangist Guðni Th. Jóhannesson ekki við áskoruninni verði haldið áfram að skora á hann að samþykkja ekki þau frumvörp sem muni leiða af þriðja orkupakkanum í framtíðinni.

„Ef allt þetta bregst held­ur bar­átt­an áfram, það kem­ur orkupakki fjög­ur, kosn­ing­ar og síðan næstu kosn­ing­ar,“ bætir Frosti við. „Þá mun­um við biðja alla stjórnmála­flokka að gefa upp hver afstaða þeirra er til orku­mála svo að kjós­end­ur geti valið flokka. Þetta er sann­ar­lega eitt mikilvæg­asta hags­muna­mál þjóðar­inn­ar. Eng­in þjóð á meira und­ir raf­orku­mál­um en Íslend­ing­ar. Við erum tvö­falt meiri raf­orkuþjóð en Norðmenn miðað við íbúa­fjölda.“