Stefnt er að undirritun kjarasamnings milli VR, Eflingar, VLFA, VLFG, LÍV og Framsýnar auk samflotsfélaga innan Starfsgreinasambandsins, og Samtaka atvinnulífins í húsakynnum ríkissáttasemjara í dag. Áætlað var að skrifa undir samninginn klukkan 15:00 en undirritunin hefur dregist. Í samningnum er lögð sérstök áhersla á hækkun lægstu launa. Fréttablaðið greinir frá.
Kjarasamningurinn gildir frá 1. apríl 2019 til 1. nóvember 2022 og samkvæmt heimildum Fréttablaðsins er þar lögð sérstök áhersla á hækkun lægstu launa. Þannig er áætlað að lægstu laun hækki um tæpar 90 þúsund krónur á mánuði á samningstímanum. Almenn hækkun launþega á sama tíma myndu nema tæpum 70 þúsund króna á mánuði.
Í samningnum er að finna sérstakt ákvæði sem tryggja á launafólki hlut í aukningu landsframleiðslu. Aukist hagvöxtur á milli ára kæmi þannig til launaauki. Einnig er stigið stórt skref varðandi styttingu vinnuvikunnar og gert ráð fyrir að hún verði að jafnaði 36 klukkustundir, sem yrði þó útfærsluatriði á hverjum vinnustað.
Samningsaðilar gera einnig ráð fyrir því að með þessum kjarasamningi og aðkomu stjórnvalda geti skapast skilyrði fyrir vaxtalækkun Seðlabankans. Fyrr í dag greindi Kjarninn frá því að ríkisstjórnin verðleggi framlag sitt við það sem hún kallar „lífskjarasamninga“ á 100 milljarða króna á samningstímanum. Þetta framlag ríkisstjórnarinnar sé til þess fallið að greiða fyrir gerð þess kjarasamnings sem nú standa vonir til að verði undirritaður hvað á hverju.
Þrátt fyrir að ekki sé búið að kynna formlega hvað leynist í kjarasamningnum er talið að eftirfarandi atriði kunni einnig að vera hluti af honum, líkt og Vísir.is greinir frá:
- Engin verðtryggð lán frá árinu 2020 til lengri tíma en 25 ára
- Lágmarkslengd verðtryggðra lána verði 10 ár
- Húsnæðisliðurinn tekinn úr vísitölu verðtryggðra lána
- Ákvæði í kjarasamningnum að segja honum upp lækki Seðlabankinn ekki vexti
- Níu þúsund króna skattalækkun til lágtekjufólks
