Þegar listar Frjálsrar verslunar yfir tekjur einstaklinga árið 2014 eru skoðaðir, kemur í ljós að almennt sýna sérfræðingar ekki háar tekur. Það gildir t.d. um ýmsa sem vitað er að bera mjög mikið úr býtum. Þetta á ekki síst við um lögfræðinga sem hafa haft gríðarlegar tekjur á árunum eftir hrun, m.a. frá slitabúum banka og þrotabúum ýmissa fyrirtækja.
Ástæða þessa er sú að margir sérfræðingar velja að hafa rekstur sinn í sérstökum félögum sem taka við þeim tekjum sem þeir afla. Síðan greiða þeir sér laun sem sýndur er í skattskrám. Þeir geta einnig tekið út arð úr félögum sínum og greiða þá fjármagnstekjuskatt af honum.
Umrætt fyrirkomulag er ekki síst notað hjá lögfræðingum, endurskoðendum, verkfræðingum, arkitektum, listamönnum, ráðgjöfum og einnig eitthvað meðal lækna.
Með þessum hætti er ekki verið að fara á svig við skattalög heldur nýta sér fyrirkomulag sem losar viðkomandi aðila við þá miklu athygli sem tekjuháir einstaklingar þurfa að lifa við þegar skattskrár eru gerðar opinberar og verða tilefni til umfjöllunar fjölmiðla eins og nú er raunin.
