Á fundi bæjarstjórnar Seltjarnarness í gær var samþykkt að sveitarfélagið myndi taka þátt í greiningar- og hönnunarvinnu með öðrum sveitarfélögum á höfuðborgarsvæðinu vegna fyrirhugaðrar Borgarlínu. Þátttaka Seltjarnarnesbæjar í fyrsta fasa verkefnisins var samþykkt með sex atkvæðum gegn einu. Magnús Örn Guðmundsson, forseti bæjarstjórnar, var sá eini sem greiddi atkvæði á móti.
Öll sveitarfélögin á höfuðborgarsvæðinu hafa þar með samþykkt að taka þátt í fyrsta fasa verkefnisins. Munu þau samanlagt leggja 300 milljónir króna til fyrsta fasans, á móti 300 milljónum frá ríkinu.
„Ég fagna því samstarfi, sem nú verður farið í með ríkinu og Vegagerðinni í að skoða hvernig hægt er að efla almenningssamgöngur á höfuðborgarsvæðinu og hlakka bara til að sjá hvað kemur úr þeirri vinnu,“ segir Ásgerður Halldórsdóttir, bæjarstjóri Seltjarnarness, í samtali við Morgunblaðið í dag. Hún bætir við að næsta skref muni koma eftir að þeirri forvinnu lýkur og að ekki veði farið í næsta fasa verkefnisins nema ásættanlegur samningur náist við ríkið.
Klofningur hjá Sjálfstæðismönnum
Í gær var greint frá því að klofningur hefði myndast meðal Sjálfstæðismanna á Seltjarnarnesi vegna málsins. Þrír af fjórum bæjarfulltrúum flokksins greiddu atkvæði með því að samþykkja að taka þátt í uppbyggingu Borgarlínu en Magnús Örn Guðmundsson, forseti bæjarstjórnar, var sá eini í bæjarstjórn sem greiddi atkvæði gegn því. Hann hafði áður lagt fram bókun á fundi bæjarráðs þann 23. maí síðastliðinn þar sem hann útlistaði ástæður þess að hann legðist gegn Borgarlínu. Auk þess sendi Sjálfstæðisfélag Seltirninga frá sér bókun í fyrrakvöld og lýsti yfir stuðningi við sjónarmið Magnúsar.
Í bókun Magnúsar sagði meðal annars að áætlanir um heildarkostnað og fjármögnun verkefnisins væru í besta falli óljósar og að óábyrgt væri af kjörnum fulltrúum að skrifa undir samninga sem hafi óþekkta útkomu fyrir skattgreiðendur. Í bókun Sjálfstæðisfélags Seltirninga kom meðal annars fram að undirritun samninga um Borgarlínu væri á skjön við stefnuskrá flokksins í bænum.
