„Ellefti karlinn var ráðinn útvarpsstjóri í vikunni andspænis flóru fremstu fjölmiðlakvenna landsins,“ skrifar Herdís Kjerulf Þorgeirsdóttir, lögmaður, um RÚV í grein sem birtist í Morgunblaðinu í dag. Herdís er doktor í lögum með tjáningarfrelsi fjölmiðla sem sérsvið og er á meðal þeirra sem sóttu um stöðu útvarpsstjóra RÚV
Stefán Eiríksson, borgarritari Reykjavíkurborgar og fyrrverandi lögreglustjóri á höfuðborgarsvæðinu, var ráðinn útvarpsstjóri Ríkisútvarpsins til næstu fimm ára nú í janúar.
Krafan um kona var tifandi tímasprengja
Herdís rifjar upp meginreglur jafnréttislaga í grein sinni; að veita skyldi konu starf ef hún er að minnsta kosti jafnt að því komin hvað varðar menntun og annað sem máli skiptir og karlmaður sem við hana keppir ef á starfssviðinu er fáar konur.
Hún bendir á að í níutíu ára sögu ríkisútvarpsins hafi engin kona gegnt stöðu útvarpsstjóra. Því hafi krafan um konu í stól útvarpsstjóra verið tifandi tímasprengja.
„Þegar staðan var auglýst laus til umsóknar var krafan um konu í stól útvarpsstjóra orðin tifandi tímasprengja. Yrði karl tekinn umfram konu í stöðuna þyrfti hann að hafa augljósa yfirburði á þeim sviðum sem gerð voru að skilyrði,“ skrifar Herdís og tekur fram að margar af færustu fjölmiðlakonum landsins hafi sótt um starfið en engin þeirra komist áfram eftir fyrsta viðtal. Þrír karlar og ein kona hafi ratað í lokaúrtakið.
Stjórn ríkisútvarpsins hafi markvisst útilokað færustu fjölmiðlakonur landsins
Herdís fullyrðir að hæfnis- og kynjasjónarmið hafi ekki legið til grundvallar valinu í lokaúrtakinu. Krafan um sanngjarnt og gagnsætt ráðningarferli var að engu höfð.
„Svo virðist sem stjórn ríkisútvarpsins hafi markvisst útilokað þessar konur á lokametrunum til að forðast óhagstæðan samanburð við þann sem ráðinn var í því skyni að hindra jafnréttiskærur.“
Herdís lokar greininni með spurningu til stjórnar ríkisútvarpsins:
„Hvaða umfram-hæfnisþættir og yfirburðir réðu ráðningu ellefta karlsins í stöðu útvarpsstjóra?“
