Seint í gærkvöld var greint frá því að Ásgeir Sveinsson hefði verið kjörinn oddviti Sjálfstæðisflokksins í Mosfellsbæ. Aðrir og prófkjörsframbjóðendur hafa nú sakað Ásgeir um að hafa stundað óheiðarlega kosningabaráttu. Frá þessu greinir Mbl.is.
Það eru þær Kolbrún G. Þorsteinsdóttir, bæjarfulltrúi sem sóttist einnig eftir oddvitasætinu, og Kristín Ýr Pálmarsdóttir varabæjarfulltrúi bera Ásgeir þessum þungu sökum.
Kolbrún segist meðal annars hafa fengið hótunarsímtöl frá stuðningsmönnum Ásgeirs síðustu tvö ár. Hún segir að sér hafi verið hótað öllu illu ef hún myndi ekki láta sig hverfa. Og þá segir hún þessar hótanir vera ástæðu þess að hún þurfti að hætta sem formaður bæjarráðs.
„Ég hef fengið hótunarsímtöl frá stuðningsmönnum hans síðustu tvö ár. Það var ýmislegt sem gerðist á kjörtímabilinu þar sem að sterkir menn í flokknum hótuðu mér öllu illu ef ég myndi ekki láta mig hverfa. Það var meðal annars ástæða þess að ég þurfti að hætta sem formaður bæjarráðs.“ sagði Kolbrún.
Hún sakar Ásgeir um að hafa notað íþróttahreyfinguna og stóran byggingarverktaka í bænum til að vinna gegn sér íprófkjörsbaráttunni, og þá hafi umræða um fjármál fyrrverandi eiginmanns hennar einnig verið notuð til að koma höggi á Kolbrúnu.
Kolbrún segist ætla að ljúka kjörtímabilinu, en ekki ætla að kjósa flokkinn í komandi kosningu, en Kristín Ýr segist ekki ætla að klára kjörtímabilið og hefur sagt sig úr flokknum.
