Sigurður G. Guðjónsson, hæstaréttarlögmaður segir Sérstakan saksóknara hafa misbeitt valdi sínu við rannsókn á starfsemi Glitnis - og undarlegt megi heita í því ljósi að svoleiðis stofnun hafi verið kosin ríkisstofnun ársins oftar en einu sinni.
Sigurður rekur málavöxtu í fésbókarfærslu sinni í dag: \"Föstudaginn 7. maí 2010, sendi slitastjórn Glitnis banka hf. sérstökum saksóknara bréf, sem var 21 lína að lengd. Yfirskrift bréfsins var ,,Ábending um atvik sem talið er að geti gefið tilefni til rökstudds gruns um refsivert athæfi\".
Í bréfinu var vikið að þvi, að rannsókn Kroll Associates Ltd., sem verið hafði á mála hjá skilanefnd og slitastjórn Glitnis banka hf., frá lokum maí 2009, á bókhaldi bankans gæfi tilefni til gruns um refsivert athæfi af hálfu sjö aðila sem skilanefnd og slitastjórn höfðu ákveðið að stefna fyrir dóm í Bandaríkjunum.
Þau refsiverðu brot sem slitastjórn Glitnis banka hf. taldi rannsókn Kroll hafa leitt í ljós voru m.a. auðgunarbrot og markaðsmisnotkun. Síðargreinda brotið getur lögregla ekki rannsakað nema kæra eða beiðni um rannsókn komi frá Fjármálaeftirlitinu.
21 línu bréfinu fylgdi svokallað minnisblað frá Kroll og uppkast bandarískrar lögmannstofu af stefnu dagsett 6. maí 2010.
Sérstakur saksóknari fól Hólmsteini Gauta Sigurðssyni starfsmanni sínum þessa tilkynningu til úrvinnslu. Hann er helst þekktur fyrir það að hafa haft sem verktaka sér við hlið Jón H. B. Snorrason, sem er einn af yfirmönnum lögreglunnar á Höfuðborgarsvæðinu.
Mánudaginn 10. maí 2010 var Hólmsteinn Gauti búinn að yfirfara ölll gögnin sem borist höfðu frá slitastjórn Glitnis banka hf., jafnvel þau sem bárust ekki fyrr en 10. maí.
Á grundvelli gagnanna gekk Hólmsteinn Gauti frá, annars vegar kröfu um hlustun og hljóðritun, og hins vegar kröfu um gögn frá fjarskiptafyrirtækjum vegna allra þeirra sem slitastjórn Glitnis banka hf. tilgreindi í stefnudrögunum sem stefndu fyrir rétti í Bandaríkjunum.
Beiðnirnar voru ítarlegar annars vegar 5 síður og hins vegar 6 síður. Í þeim var tekið fram að hlerunar væri krafist vegna kæru frá slitastjórn Glitnis banka hf.
Sérstakur saksóknari valdi Héraðsdóm Reykjaness til að fá úrskurði um umbeðnar þvingunaraðgerðir. Beiðnirnar voru lagðar fram 11. maí 2010 í Héraðsdómi Reykjaness.
Sveinn Sigurkarlsson þáverandi héraðsdómari fékk kröfurnar til úrlausnar og samdi á undra skömmum tíma tvo sjö síðna úrskurði um hlerun og afhendingu gagna hjá umbjóðanda mínum.
Dómarinn virðist ekki hafa spurt neinna spurninga svo sem þeirrar hvar kæran frá slitastjórn Glitnis banka hf. væri. Hefði það þó verið eðlileg spurning hjá dómara ætlaði hann að byggja úrskurð sinn á réttum grunni, því með beiðnum Hólmsteins Gauta fylgdu bara tvö skjöl. Annað svokölluð tengslamynd og hitt var 21 línu bréf slitastjórnar Glitnis banka hf. til sérstaks saksóknara frá 7. maí 2010.\"
Síðar segir í færslu lögmannsins: \"Dómarinn hirti ekkert um friðhelgi einkalífs þeirra,sem hann heimilaði hlerun hjá, án þess að hafa nokkur gögn sem byggja mátti slikan úrskurð á. Eftir að hafa skoðað þau gögn, sem mér hefur tekist að slíta út frá embætti sérstaks saksóknara vegna hlerunnar á síma umbjóðanda míns, fæ ég ekki annað séð en embætti sérstaks saksóknara hafi fyrst og síðast verið að ganga erinda slitastjórnar Glitnis banka hf., með hlerunum.
Slitastjórnin hafði boðað til blaðamannsfundar á Hótel Nordica 11. maí til að kynna málshöfðun í New York á hendur þeim aðilum sem Hólmsteinn Gauti laug að dómara við Héraðsdóm Reykjaness að kærðir hefðu verið með 21 línu bréfinu frá 7. maí 2010.
Slitastjórninni var nauðsyn á að geta komist að raun um viðbrögð stefndu og hvað þeim færi á milli í kjölfar þess að málshöfðun á hendur þeim væri gerð opinber.
Þessi háttsemi fól í sér misbeytingu opinbers valds og er sennilega ekki eina tilvikið í eftir hruns málum.
Hjá embætti sérstaks saksóknar virðist tilgangurinn oftar en ekki hafa helgað meðalið.
Slæmt til þess að vita að slík stofnun hafi verið kosin ríkisstofnun ársins oftar en einu sinni. Það kjör kann að hafa byggst á jólapartýum, eins og því þegar ameríska þemað var alls ráðandi, og kontórnum við Skúlagötu, skipt East- og Westving, eins og Hvítahúsinu.\"
