Umfangsmiklar virkjanaframkvæmdir verða ekki nauðsynlegar ef leggja á raforkusæstreng frá Íslandi til Bretlands, að því er fram kemur í grein sem framkvæmdastjóri þróunarsviðs Landsvirkjunar skrifar í Fréttablaðið í dag.
Þar fullyrðir Óli Grétar Blöndal Sverrisson, sem gegnir fyrrgreindri stöðu hjá Landsvirkjun, að ekki þurfi að reisa sem nemur frá einni til tveggja Kárahnjúkavirkjana til þess að afla orku fyrir raforkusæstreng til Bretlands, en andstæðingar lagningarinnar hafa haldið því mjög á lofti á undanförnum vikum.
Í greininni segir Óli Grétar jafnframt að margt bendi til þess að um arðsamt verkefni geti verið að ræða sem muni auka orkuöryggi á Íslandi og gera Íslendingum kleift að nýta betur auðlindir sínar: \"Hins vegar eru margir óvissuþættir til staðar og ekki hægt á þessari stundu að taka ákvörðun um hvort eða hvenær sæstrengur verði lagður frá Íslandi. Landsvirkjun hefur lagt til að á næstu 2-3 árum verði gerð ítarleg greining á kostum og göllum þess að tengja Ísland við raforkukerfi Evrópu,“ skrifar hann í grein sinni.
Hann bendir á reynslu Norðmanna sem hafa nýlega lagt sæstrengi til Hollands og Danmerkur auk þess að hafa tvo aðra sæstrengi í bígerð, til Bretlands og Þýskalands: \"Þetta hafa þeir gert án þess að leggja í nýjar stórfelldar virkjanaframkvæmdir.“
Landsvirkjun gerir ráð fyrir að sæstrengur þyrfti árlega um 5,0 TWst af raforku. Til samanburðar er orkugeta Kárahnjúkavirkjunar 5,0 TWst og Hellisheiðarvirkjunar 2,5 TWst. Óli Grétar segir í grein sinni að sérkenni sæstrengs fyrir Ísland séu að hann veitir aðgang að nýjum, stórum og sveigjanlegum markaði fyrir útflutning á rafmagni sem þegar sé til, en eigi nú að heita læst inni vegna einangrunar íslenska markaðarins: \"Með bættri nýtingu kerfisins, án nýrra virkjana, væri hægt að fá um 2,0 TWst, eða 40% af orkuþörf sæstrengs. Vindorka og smærri virkjunarkostir gætu gefið um 1,5 TWst eða 30%. Nýjar jarðvarma- og vatnsaflsvirkjanir úr nýtingarflokki rammaáætlunar gætu gefið um 1,5 TWst eða 30%. Því má segja að um 70% orkuöflunar væru óhefðbundin fyrir núverandi kerfi en 30% hefðbundin orkuöflun með nýjum jarðvarma- og vatnsaflsvirkjunum,“ segir í grein Óla Grétars.
