"Það er í rauninni alveg ótrúlegt að verða vitni að því að sjá tvo ráððherra rífast svona opinberlega í fjölmiðlum og það á svona eldfimum tímum," sagði Þórður Snær Júlíusson ritstjóri Kjarnans um núninginn sem verið hefur millum fjármála- og félagsmálaráðherra síðustu daga.
Þetta var meðal þess sem fram kom í Rtistjórunum á Hringbraut í gærkvöld þar sem Þórður Snær, Karl Th. Birgisson ritstjóri Herðubreiðar og Steingerður Steinarsdóttir ritstjóri Vikunnar litu yfir sviðið og brutu helstu fréttamál líðandi stundar til mergjar. Þórður sagði greinilegt að Eyglóu Harðardóttur félagsmálaráðherra hefði brugðið mjög þegar Kjarninn fékk þá vitneskju í síðustu viku að fjármálaráðuneytið ætlaði ekki að kostnaðargreina frumvarp hennar um styrki til félagslegs húsnæðis, en almennt var talið að lagasetning í þá veru myndi liðka fyrir kjarasamningum. Hún hefði í raun fyrst þá frétt af afstöðu fjármálaráðherrans - og síðan hefðu þau Bjarni rifist fyrir opnum tjöldum sem væri fáheyrt og raunar bagalegt á jafn miklum átakatímum og nú væru á Íslandi.
Ritstjórarnir ræddu líka pólitíska arfleifð Halldórs Ásgrímssonar sem féll frá í byrjun vikunnar. Hann hefði án nokkurs vafa verið einn áhrifaríkasti stjórnmálamaður seinni áratuga og átt beina aðild að mörgum umdeildustu málum í seinni tíma sögu landsmanna; kvótamálinu, 90% húsnæðislánum og aðild Íslands að Íraksstríðinu "en mér þótti alltaf mjög vænt um Halldór," sagði Karl Th. Birgisson sem sagði hann hafa verið einarðan Evrópusinna sem ásamt Jóni Sigurðssyni og Valgerði Sverrisdóttur hefði freistað þess að gera flokk sinn víðsýnan og hafinn yfir heimagerða hagsmuni. Innlegg hans í Evrópuumræðuna væri í raun einstakt, ekki síst í lausnamiðaðri sýn hans í sjávarútvegsmálum Evrópuþjóða. Nú væri Framsókn hins vegar kominn hægra megin við UKIP í Bretlandi.
Þórður Snær taldi allar aðstæður nú vera hagfelldar til að losa um höftin og það yrði gert nú fyrir mitt ár; frumvörp fjármálaráðherra sem væri byggð á sýn Seðlabankans í málinu myndu nást fram á sumarþingi og um það væri enginn efi í hans huga. Vextir ytra væru mjög lágir, verðbólga hér á landi mjög lág og fjármunir hefðu sjaldan eða aldrei jafn litla ástæðu til að fara úr landi og einmitt núna.
Steingerður Steinarsdóttir ræddi nýjustu tölur Hagstofunnar um launamun kynjanna sem virðist meira og minna alltaf vera sá sami, ekki aðeins á almennum vinnumarkaði heldur einnig hjá ríkinu: Hún taldi það gamla bábilju að ástæðuna megi rekja til eðlismunar á körlum og konum, að þær síðarnefndu sæktust síður eftir betri launum en karlar. Ungar konur í dag væru fullkomlega meðvitaðar um sitt verðmæti - og því væri harla dapurlegt fyrir sig sem gekk í Kvennalistann snemma á níunda áratug síðustu aldar til að bæta hag dætra sinna að sjá þær vera akkúrat í sömu sporum launalega og hún sjálf hefði staðið í á sínum yngri árum.
Karl Th. taldi einu raunhæfu leiðina í þessum efnum að hvetja fyrirtæki til að taka upp jafnlaunastefnu. Þórður Snær sagði vandann liggja í karllægum peningaheimi; allar meiriháttar ákvarðanir um fjármagn í landinu væru teknar af karlmönnum og þar væri raunverulega valdið að finna. Okkur yrði ekki ágengt í baráttunni fyrir jöfnun launum fyrir sömu vinnu fyrr en konur fengju þessi mikilvægu völd til jafns á við karla.
Ritstjórarnir eru frumsýndir á þriðjudagskvöldum á Hringbraut klukkan 21.30 en hægt er að skoða þáttinn í heild sinni á hringbraut.is og einnig klippur úr honum.
