Segir ís­land sex­tíu árum á eftir á­ætlun í snjó­flóða­vörnum

„Miðað við þann kostnað sem vantar upp á til að klára varnirnar, þá mun það taka 50 ár að klára þetta, á sama hraða og hefur verið, en þetta átti nú að klárast fyrst 2010. En það er vel hægt að spýta í lófana og klára þetta á 10 árum,“ er haft eftir Kristínu Mörthu Hákonar­dóttur, ofan­flóða­sér­fræðingi hjá Verkís verk­fræði­stofu á Eyjunni.

Hún gagn­rýnir stjórn­völd fyrir seina­gang í byggingu snjó­flóða­varna og vonast hún til þess að ríkis­stjórnin ranki við sér eftir það sem gerðist í gær, þegar þrjú snjó­flóð féllu á Vest­fjörðum.

„Þegar það er þensla í þjóð­fé­laginu hefur verið dregið úr fjár­mögnun í upp­byggingu varna því allir verk­takar eru á fullu í öðru. En svo þegar er sam­dráttur í þjóð­fé­laginu, þá er líka dregið úr fjár­mögnun, vegna sparnaðar. Það var ekki ætlunin með lögunum um snjó­flóða­varnir, sem sett voru í mjög skýrum til­gangi,“ segir Kristín.

Hún segir að upp­haf­lega hafi átt að ljúka upp­byggingunni árið 2010 sam­kvæmt reglu­gerð um hættu­mat frá árinu 2000 um hættu­legustu svæðin.

„Það stefnir í að við verðum 60 árum á eftir á­ætlun, sem er ó­heppi­legt því við verðum öll dauð sem höfum starfað í þessu og því gæti orðið ó­sam­fella í þekkingu, sem er aldrei gott,“ segir Kristín.

Við­brögð stjórn­valda við á­skorunum frá því síðasta vor um að bætt yrði úr þessu hafi verið von­brigði.

„Get ekki annað en í­trekað að einungis er búið að verja um helming þeirra svæða þar sem snjó­­flóða­hætta er yfir á­­sættan­­legum mörkum – og að nægir fjár­munir eru í Ofan­­­flóða­­sjóði til að ljúka þessum verk­efnum á næstu 10 árum.“