Daníel Rúnarsson, ljósmyndari og einn af stofnendum Kasmír veflausna og markaðsmála, segir fjölmiðlafrumvarp Lilju Alfreðsdóttur mennta- og menningarmálaráðherra vera einhverja þá samkeppnis fjandsamlegustu aðgerð sem hafi sést á íslenskum markaði í mörg ár.
Daníel tekur til máls í þræði á Twitter og segir fjölmiðla sem einblína á einn málaflokk, Fótbolti.net sem dæmi, ekki eiga möguleika á endurgreiðslu. „Hins vegar munu þeirra helstu keppinautar (mbl.is, visir.is, dv.is/433) fá stóran hluta kostnaðar endurgreiddan. Sanngjarnt? Hvernig á slíkur fjölmiðill að keppa um starfsfólk þegar samkeppnin fær 25 prósent launakostnað endurgreiddan frá ríkinu? Sami starfsmaður gæti kostað fyrirtæki A 500.000 á mánuði en fyrirtæki B 375.000 á mánuði. Fyrirtæki B býður honum aðeins hærri laun og allir sáttir. Nema fyrirtæki A,“ skrifar Daníel.
Hann veltir því fyrir sér hvað frumvarpið þýði fyrir nýja fjölmiðla. „Þeir þurfa að lifa við það a.m.k. fyrstu 12 starfsmánuðina að fá enga endurgreiðslu í samkeppni við fjölmiðla sem fá endurgreiðslu. Sanngjarnt? Fjölmargir nýir miðlar lifa ekki fyrstu 12 mánuðina af. Spyrjið bara Simma Vill.“
„Það eru ekki allir fjölmiðlar reknir illa / í tapi. Fjölmiðlar sem eru reknir vel / í plús í dag eru í raun að fá gefins viðbótarhagnað frá ríkinu. Er það eðlileg tilfærsla fjármagns? Ef ríkið vill raunverulega styðja við íslenska fjölmiðlun þá væri mikið nærtækara að „frelsa“ það auglýsingafjármagn sem fer til RÚV í dag. Vissulega færi það ekki allt til innlendra fréttamiðla - en þeir myndu a.m.k. fá að keppa um það á sanngjörnum samkeppnisgrundvelli,“ skrifar Daníel einnig.
Daníel segist nánast enga gagnrýni hafa séð um frumvarpið í fjölmiðlum. „Er það virkilega svo að félagar mínir þar sjái ekkert athugavert við þetta? Eða er dúsan bara svona sæt?“
Í fjölmiðlafrumvarpinu, sem er nú í opnu samráði og verður lagt fyrir á vorþingi, kemur fram að stuðningur ríkisins við einkarekna fjölmiðla sé háður skilyrðum. Þessi skilyrði, sem Daníel leggur út af í skrifum sínum, eru eftirfarandi:
- Aðalmarkmið fjölmiðils skal vera miðlun frétta, fréttatengds efnis og umfjöllun um samfélagsleg málefni.
- Fjölmiðill skal hafa veitt fullnægjandi upplýsingar um eignarhald og yfirráð.
- Efni fjölmiðilsins skal vera fjölbreytt og fyrir allan almenning á Íslandi.
- Prentmiðlar skulu koma út að lágmarki 48 sinnum á ári. Netmiðlar, hljóð- og myndmiðlar og aðrir sambærilegir miðlar skulu miðla nýju efni daglega.
- Ritstjórnarefni skal að lágmarki vera 40 prósent af því efni sem birtist í prentmiðlum sem dreift er endurgjaldslaust. Ritstjórnarefni í öðrum prentmiðlum og netmiðlum skal að lágmarki vera helmingur af birtu efni.
- 1/6 hluti ritstjórnarefnis skal byggja á sjálfstæðri frétta- eða heimildaöflun.
- Starfsmenn í fullu starfi skulu vera að lágmarki þrír (eða einn hjá staðbundnum miðlum).
- Fjölmiðill hafi starfað óslitið í tólf mánuði eða lengur fyrir þann tíma er umsókn um endurgreiðslu berst til fjölmiðlanefndar.
- Fjölmiðill sé ekki í vanskilum við opinbera aðila eða lífeyrissjóði.
