Ný verksmiðja Silicor Materials á Grundartanga í Hvalfirði er fjárfesting að andvirði 120 milljarða króna og framleiðslan sem þar verður er svo gott sem algjörlega laus við mengun.
Þetta fullyrtir Terry Jester forstjóri stórfyrirtækisins í samtali við Pál Magnússon í þættinum Þjóðbraut í gærkvöld. Hún segist skilja að fólk hafi áhyggjur af mengun frá fyrirhugaðri sólarkísilverksmiðju í Hvalfirði, en þær áhyggjur séu óþarfar. Örugg orka á samkeppnishæfu verði, nálægð við álver og fríverslunarsamningur við Kína geri Ísland að ákjósanlegum vettvangi fyrir þessa framleiðslu.
Nýja verksmiðjan kallar á 450 ný störf en þar með verða starfsmenn þriggja verksmiðja á Grundartanga orðnir á annað þúsund talsins.
Hægt er að horfa á Þjóðbraut í heild sinni eða klippur úr henni á hringbraut.is.
