Seðlabanki Íslands hefur afhent fjölmiðlum samskipti lögmanns Samherja og Ásgeirs Jónssonar, seðlabankastjóra.
Áður en hið svokallaða skæruliðadeild Samherja var afhjúpuð stundaði fyrirtækið það að láta lögmenn senda bréf á ýmsa aðila, fékk RÚV meðal annars slíkt bréf.
Kjarninnkrafði bankann um bréf sem Ásgeir fékk í kjölfar viðtals hans við Stundina þar sem Samherji fékk á baukinn. „Ég skil bara ekki hvern andskotann þessi lögreglustjóri þarf að rannsaka og af hverju þessu er ekki bara vísað frá. Ég óttast það að mörgu leyti, í svona eftirlitsstofnun eins og Seðlabankinn er, að við lendum í því að við verðum hundelt persónulega eins og farið var á eftir þessu starfsfólki,“ sagði Ásgeir við Stundina.
Garðar Gíslason lögmaður sendi bréf fyrir hönd Samherja í apríl síðastliðnum og spurði hvort þetta væri rétt haft eftir Ásgeiri. Þar fylgdi með skoðun stjórnenda fyrirtækisins á málinu:
„Hverju sem líður kæru umbjóðenda minna til lögreglu geta naumast verið um það áhöld að allt í senn dómstólar, umboðsmaður Alþingis og forsætisráðherra hafa metið það svo að starfsmenn Seðlabanka Íslands hafi brotið gegn lögum í embættisfærslu sinni gagnvart umbjóðendum mínum,“ segir í bréfi Garðars.
„Það væri þakkarvert að fá upplýst frá þér hvort það sé réttur skilningur á tilvitnuðum ummælum þínum, séu þau rétt eftir þér höfð, að þú sért þeirrar skoðunar að þeir borgarar sem verða fyrir barðinu á ólögmætri embættisfærslu af hálfu opinberra starfsmanna, sem fara með mikið vald til inngripa og afskipta af borgurunum, eigi ekki að standa vörð um rétt sinn eða koma því til leiðar að slík embættisfærsla verði rannsökuð af þar til bærum aðilum og í samræmi við gildandi lög í landinu?“
Í svari Ásgeirs segir að það sé rétt haft eftir honum:
„Seðlabankastjóri gerir ekki ágreining um efnisinnihald tilvitnaðra ummæla í viðtalinu. Þau lutu ekki að sjálfsögðum rétti borgaranna til þess að leita til lögreglu eða annarra bærra yfirvalda telji þeir á sér brotið lögum samkvæmt.“
Seðlabankinn reyndi að leyna innihaldi bréfanna með vísun í að bankinn sé undanskilinn upplýsingalögum þrátt fyrir mörg fordæmi séu fyrir því að Seðlabankinn þurfi að afhenda gögn eins og aðrar stofnanir. Voru þau loks afhent eftir kæru til úrskurðarnefndar til upplýsingamála.
