Þann 12. nóvember síðastliðinn óskaði forsætisráðherra eftir greinargerð bankaráðs Seðlabanka Íslands um mál Samherja hf. í kjölfar dóms Hæstaréttar frá 8. nóvember 2018 í máli nr. 463/2017.
Umbeðin greinargerð bankaráðs Seðlabanka Íslands barst forsætisráðuneytinu 21. febrúar síðastliðinn og hefur hún áður verið gerð opinber. Í framhaldi af móttöku greinargerðarinnar óskaði forsætisráðherra með bréfi, dagsett 15. mars síðastliðinn, eftir nánari upplýsingum, skýringum og gögnum um eftirtalda þrjá þætti málsins er lúta að:
- fyrirhuguðum úrbótum í stjórnsýslu Seðlabanka Íslands sem boðaðar eru í greinargerð bankaráðs,
- fyrirliggjandi afstöðu ríkissaksóknara frá árinu 2014 til gildis refsiheimilda sem ítarlega er fjallað um í áliti umboðsmanns Alþingis frá 22. janúar 2019
- og meintri upplýsingagjöf starfsmanna Seðlabanka Íslands til Ríkisútvarpsins um fyrirhugaða húsleit hjá Samherja hf. 27. mars 2012, samanber bréf umboðsmanns Alþingis, dagsett 4. mars 2019.
Frá þessu er greint í fréttatilkynningu frá forsætisráðuneytinu.
Í tilkynningunni segir að Seðlabanka Íslands hafi verið gefinn kostur á því að tjá sig almennt um greinargerð bankaráðs að því marki sem bankinn teldi tilefni til.
Svör Seðlabanka Íslands, sem bárust forsætisráðuneytinu 12. apríl síðastliðinn, og varða framangreinda þætti sem spurt var um sérstaklega, hafa nú verið gerð opinber ásamt viðauka sem fylgdi bréfinu.
Forsætisráðuneytið vekur athygli á því að auðkenni lögaðila og einstaklinga hafa verið afmáð úr þeim hluta svarsins sem birtur er. Þá hefur sá hluti svarbréfsins sem lýtur almennt að greinargerð bankaráðs Seðlabanka Íslands um mál Samherja hf. einnig verið afmáður. Er það afstaða ráðuneytisins að rétt sé að Seðlabankinn taki afstöðu til þess, ef á reynir, hvort heimilt sé að veita opinberan aðgang að þeim hluta svarbréfsins, sem einkum varðar mál þess tiltekna aðila, með hliðsjón af þagnarskyldureglum sem við eiga, samanber meðal annars 35. gr. laga nr. 36/2001, um Seðlabanka Íslands. Sama á við um aðgang að gögnum sem fylgdu svarbréfinu.
Í tilkynningunni segir að lokum að forsætisráðuneytið muni á næstu vikum leggja endanlegt mat á efnisatriði málsins og hvort tilefni sé til frekari gagnaöflunar eða viðbragða á grundvelli athugunar ráðuneytisins.
Bréfin má finna hér:
Bréf forsætisráðherra til Seðlabanka Íslands
Svarbréf Seðlabanka Íslands til forsætisráðherra
