Seðlabankastjórinn Ásgeir Jónsson er í viðtali um tísku í fylgiblaði Morgunblaðsins í dag um herratísku. Þar er hann meðal annars spurður út í hvernig það kom til að hann fór að klæðast jakkafötum á hverjum degi.
Hann fór ekki að spá í tísku fyrr en hann fór í doktorsnám í hagfræði, svo var það meira þegar hann fór að vinna í Kaupþingi árið 2003.
„Í bankanum þurftu menn að klæða sig upp á enda mjög stífar óskrifaðar reglur um klæðaburð í fjármálaheiminum. Ég tók á þessum tíma þá ákvörðun að ég vildi vera huggulega klæddur. Ég fór í Boss-búðina þar sem ég átti ekki jakkaföt og keypti mér þrenn föt til skiptanna. Á þessum tíma var ég mikið í samskiptum við erlenda fjármálamenn og því mikilvægt fyrir mig að vera klæddur í hlutverkið,“ sagði Ásgeir.
Ásgeir segir mikla hefð fyrir því að fólk klæði sig upp á hér á landi, meðal annars á sunnudögum.
„Það snerist meira um virðingu fyrir hvíldardeginum en eitthvað annað,“ sagði hann. Sagði hann svo að menn væru ekki teknir alvarlega í fjármálaheiminum nema þeir væru í jakkafötum. „Fjármálaheimurinn er svipaður að því leyti að ef þú vilt láta taka þig alvarlega þá mætir þú ekki á peysunni í inniskóm á fundi.“
