Svandís lagði fyrirspurnina fram eftir að Tony Blair, fyrrverandi forsætisráðherra Bretlands, baðst afsökunar á rangri upplýsingagjöf til almennings í aðdraganda Íraksstríðsins. Svandís innti forsætisráðherra eftir því hvort til greina kæmi að íslensk stjórnvöld gengust \"fyrir sambærilegri afsökunarbeiðni stjórnvalda til Íslendinga sökum þess að sömu blekkingar voru nýttar til að skipa íslenska ríkinu í hóp stuðningsríkja árásarstríðsins gegn Írak“
Ráðherra segir í svari sínu að gögn sem birt voru á vef utanríkisráðuneytisins sýni að íslensk stjórnvöld hafi ekki haft \"nokkra aðkomu að ákvörðun um árás Bandaríkjanna og bandamanna þeirra á Írak, undir stjórn Saddams Hussain.“
Forsætisráðherra segir að þvert á móti sýni gögnin að skráning Íslands á lista hinna viljugu þjóða hafi verið að frumkvæði bandarískra stjórnvalda \"og að sá fulltrúi íslenska utanríkisráðuneytisins sem veitti listanum viðtöku hafi gert erindreka bandarískra stjórnvalda ljóst að Ísland væri herlaust ríki og gæti ekki stutt hernaðaraðgerðir.“
Hann bendir á að aðkoma Íslands hafi verið bundin við fyrirheit um þátttöku um uppbyggingu í Írak að stríð loknu auk þess sem flug yfir landið og millilendingar voru heimilaðar.
Sigmundur Davíð tekur skýrt fram í svarinu að ekki hefði átt að heimila bandarískum stjórnvöldum að skrá Ísland á lista sem tengdur var við hernaðaraðgerðir og að \"eftir birtingu listans hefði verið æskilegt að Íslendingar hefðu áréttað betur, opinberlega, að vera á listanum fæli ekki í sér stuðning við hernaðaraðgerðir eins og fulltrúa bandarískra stjórnvalda hafði verið gert ljóst þegar hann afhenti listann.“
