Hallgrímur var gestur í Vikunni með Gísla Marteini í gærkvöld - og er hér vitnað til fréttar RÚV um viðtalið, en þar ræddi hann nýja skáldævisögu sína, Sjóveikur í München, og viðbrögðin við henni. Í bókinni segir hann frá því að honum hafi verið nauðgað af ókunnugum karlmanni á námsárunum í München. Að þessu hæddist Guðbergur Bergsson rithöfundur í pistli í DV og skrifaði meðal annars: „Hvaða kynvillingur hefur haft svona slæman smekk? Hefði ekki verið eins gott að fara upp á marglyttu og að fást við saklausa þjóhnappa hans? Líklega mun hið sanna seint koma í ljós.“
Pistill Guðbergs olli mikilli reiði og hneykslan en margir komu honum einnig til varnar. Sjálfur segist Hallgrímur sár yfir viðbrögðunum við orðum Guðbergs: \"Þetta var svo skrýtið. Ég var svolítið sár yfir viðbrögðum annarra í framhaldinu. Það var einhver umræða á Facebook - sem ég sá allt of mikið af - og menn voru að skrifa á minn vegg, að út frá einhverjum bókmenntalegum og fagurfræðilegum forsendum verðum við að skilja þennan texta öðruvísi,“ sagði rithöfundurinn í þætti Gísla Marteins.
