Samtök verslunar og þjónustu hafa sent ráðgjafarnefnd um inn- og útflutning landbúnaðarvara erindi vegna framboðsskorts á innlendum lambahryggjum sem þegar hefur komið fram hjá aðildarfyrirtækjum samtakanna. Í erindinu skora samtökin á ráðgjafarnefndina að framkvæma hið fyrsta lögbundið framboðsmat sem er nauðsynlegt til að úr því fáist skorið hvort sjávarútvegs- og landbúnaðarráðherra sé orðið skylt að úthluta tollkvóta vegna innflutnings lambahryggja sem annars bera mjög háa tolla.
Í erindinu til ráðgjafanefndarinnar leggja samtökin sérstaka áherslu á þá ríku skyldu sem hvílir á nefndinni að sannreyna hver raunverulega framboðsstaðan er. Að mati samtakanna verður nefndin að taka þessa stöðu alvarlega. Hagsmunir neytenda felast í því að geta keypt þessa eftirsóttu vöru á eðlilegu verði. Þá hefur verslunin, og til dæmis veitingastaðir, töluverða hagsmuni af því að hafa tök á að mæta eftirspurn eftir lambahryggjum.
Samtökin hafa allt frá því í febrúar síðastliðinn fengið reglulegar fréttir yfirvofandi skorti á innlendum lambahryggjum. Segja samtökin að fyrir virðist liggja að 15–20% af framleiðslu síðasta árs hafi flutt úr landi undir lok síðasta árs. Af upplýsingum á vef Hagstofu Íslands að dæma virðist söluverðið hafa verið langt undir því sem innlendum verslunum stendur til boða.
Samtökin benda á að útflutt magn af lambahryggjum hafi verið of mikið ef litið er til þróunar eftirspurnar á innanlandsmarkaði. Samtökunum hafi reglulega borist upplýsingar um að stórar innlendar afurðastöðvar geti ekki afhent matvöruverslunum lambahryggi fyrr en næsta haust, þar sem birgðir séu á þrotum. Til að bregðast við þessari stöðu hafa matvöruverslanir þegar hafið eða eru með í undirbúningi að flytja inn erlenda lambahryggi í þeim tilgangi að anna eftirspurn íslenskra neytenda og erlendra ferðamanna á söluhæsta tíma ársins.
Samtök verslunar og þjónustu segja að í ljósi umræðna um nauðsyn þess að tryggja fæðuöryggi á Íslandi yrði það verulega ankannaleg niðurstaða ef afurðastöðvar og dreifingaraðilar fá einfaldlega að komast upp með að flytja drúgan hluta kjötframleiðslu úr landi og stuðla á sama tíma að verðhækkunum til neytenda á Íslandi. Spyrja samtökin hvort það sé hluti af landbúnaðarstefnu íslenskra stjórnvalda að neytendur niðurgreiði útrás íslensks landbúnaðar með hærra kaupverði lambahryggja.
