Í nýrri samgönguáætlun til næstu 15 ára er að finna tillögu um upptöku veggjalda sem yrðu innheimt á stofnbrautum frá Reykjavík og í öllum jarðgöngum landsins í þeim tilgangi að auka fjármagn til samgöngumála og flýta þar með fyrir brýnum framkvæmdum og bæta við nýjum ef þarf. Ætlunin er að ekki verði rukkuð sértæk veggjöld allt árið um kring. Áætlað er að rukka veggjöldin í takmarkaðan tíma í senn þar til tilteknar framkvæmdir séu að fullu greiddar með þeim.
Ármann Kr. Ólafsson, bæjarstjóri Kópavogs, og Haraldur Sverrisson, bæjarstjóri Mosfellsbæjar, eru gestir Sigmundar Ernis í frétta- og umræðuþættinum 21 á Hringbraut í kvöld. Þar ræða þeir þessa fyrirhuguðu upptöku veggjalda og hvernig væri best að útfæra þau á höfuðborgarsvæðinu.
„Þetta verður samstarfsverkefni ríkis og sveitarfélaga eins og ég sé þetta og við sjáum þetta vonandi, og þar með þarf að búa til eitthvað félagsform utan um þetta, hvort sem það er hlutafélag eða eitthvað annað form. Þar mun væntanlega eignarhlutur eða kostnaðarhlutdeild sveitarfélaganna og ríkisins vera með einhverjum tilteknum hætti,“ segir Ármann Kr.
Hann bætir við: „Til þess að koma til móts við kostnaðinn þarf að rukka veggjöld. Sá félagsskapur þarf að vera algjörlega fyrir utan ríkissjóð þannig að þetta verði sérlög um þetta og menn geti ekki farið inn í hítina. Við höfum séð þetta virka. Við sáum Spöl. Spölur virkaði. Það er búið að hætta gjaldtöku þar, það er búið að ná að kosta verkefnið. Það er það sem við þurfum að horfa til.“
Hver einasta króna fari í framkvæmdir
FÍB hefur bent á að skattar og gjöld af bifreiðum hafa verið innheimt til langs tíma og að rökrétt væri að stærri hluti þeirra rynni til framkvæmda Vegagerðarinnar. Reyndin sé þó sú að lítill hluti þess fjármagns hefur runnið til slíkra framkvæmda. Ýmsir hafa því lýst yfir áhyggjum um að þeir fjármunir sem innheimtast í gegnum veggjöld fari í eitthvað annað en þær framkvæmdir sem lofað verður.
„Við erum búin að láta fara yfir það, sveitarfélögin á höfuðborgarsvæðinu í samstarfi við Vegagerðina og samgönguráðuneytið, hvað þarf til á næstu tíu árum til þess að ástandið a.m.k. versni ekki. Það á eftir að fjölga hér um 40.000-60.000 manns á næstu 20-40 árum,“ segir Haraldur.
„Það þarf að gera eitthvað. Það þarf „grand plan,“ en hvernig tryggjum við það? Við verðum að tryggja það með þeim hætti að það sé algjörlega kristaltært að hver einasta króna sem er innheimt hér á höfuðborgarsvæðinu fari í framkvæmdir á höfuðborgarsvæðinu. Það er hægt að gera það að mínu og okkar viti í góðu samstarfi. Leiðir sem við sjáum er einmitt að stofna um það rekstur, sérstakt félag, og ég held að það sé mjög mikilvægt í því sambandi til að auka trúverðugleika að sveitarfélögin á höfuðborgarsvæðinu séu í meirihluta í því félagi. Ég held að ríkið sé tilbúið í það, við höfum átt samtöl við ráðherra og ég heyrði bara góðan hljómgrunn hvað það varðar,“ segir Haraldur einnig.
Nánar er rætt við Ármann Kr. og Harald í 21 í kvöld. Þátturinn hefst klukkan 21:00.
