Samningaviðræðum milli stjórnvalda og hinna fimm sýknuðu í Guðmundar- og Geirfinnsmálunum hefur verið slitið. Íslenska ríkið ákvað að slíta umræðunum eftir að Guðjón Skarphéðinsson, einn hinna sýknuðu, hafnaði boði sáttanefndar stjórnvalda.
Þetta staðfesti Ragnar Aðalsteinsson, lögmaður Guðjóns í samtali við Mbl.is. Guðjón hafði farið fram á rúman milljarð króna í miskabætur og um það bil 400 milljónir að auki í bætur fyrir missi atvinnutekna.
Sáttanefndin hafði úr 600 milljónum króna alls að spila fyrir fimmmenninganna. Samkvæmt heimildum Fréttablaðsins hafði ríkið bætt eitthvað við upphæðina en bætur fyrir einstakling fóru ekki yfir 200 milljónir. Því er ljóst að mikið ber í milli.
„Það er sennilega engin úrlausn önnur úr því að ríkið hefur ekki áhuga á að ljúka málinu með samkomulagi,“ segir Ragnar og vísar til þess að ríkið hafi frá upphafi gefið það í skyn að ef farið yrði fram á bætur sem ríkið teldi of háar yrði dómstólaleiðin alltaf niðurstaðan. Það hafi nú fengist staðfest.
Hann segir um alvarlegustu dómsmorð seinni tíma á Íslandi vera að ræða. Nú muni það líkast til verða dómstóla að kveða á um bætur í málinu. „Þetta er ekki flókið mál, það þarf ekki að sanna eitt né annað, það þarf að ákveða fjárhæð. Í máli Guðjóns er ríkinu skylt að lögum að bæta honum tjón sem hann varð fyrir og það er svokölluð hlutlæg bótaskylda ríkisins.“
