Samherji leitaði ráða almannatengla fyrir afsökunarbeiðnina: „Þeir hringdu í okkur um helgina“

Útgerðarrisinn Samherji leitaði til almannatengla áður en þeir skrifuðu afsökunarbeiðnina sína. Samherji sendi frá sér yfirlýsingu þar fyrirtækið gekkst við því að hafa gengið of langt í viðbrögðum sínum við fréttum Stundarinnar og Kveik við meintri mútustarfsemi í Namibíu. Stundin og Kjarninn hafa svo birt fréttir sem byggja á tölvupóstum og rafrænu spjalli svokallaðrar skæruliðasveitar, sem skipa þau Þorbjörn Þórðarson, almannatengill, Arna McClure, lögmaður Samherja, og Páll Steingrímsson, skipstjóri hjá Samherja.

Eiríkur Rögnvaldsson telur að afsökunarbeiðnin hafi verið heldur rýr. Ekki sé vitað hverju sé verið að biðjast afsökunar á, hvern er verið að biðja og hver það sé í raun að baki afsökunarbeiðninni.

Ingvar Sverrisson, framkvæmdastjóri almannatengslafyrirtækisins ATON.JL, segir í samtali við Stundinaað Samherji hafi haft samband við ATON.JL um helgina. ATON.JL hafi svo sagt skoðun sína á þessu máli.

„Yfirlýsingin er alfarið á ábyrgð Samherja og þeir verða að svara fyrir hana,“ segir Ingvar. „Eins og ég segi: Þeir hringdu í okkur um helgina. Þetta er í raun það sem ég get sagt.“

Aðspurður hvort ATON.JL hafi skrifað afsökunarbeiðnina eða ekki sagði Ingvar: „Eins og ég segi þá vil ég ekki tjá mig eitt né neitt um þá ráðgjöf sem við gefum umfram það sem ég hef sagt.“