Saka rúv um að seilast í opinbert fjármagn á óeðlilegan hátt

Sam­tök iðn­að­ar­ins (SI) og Sam­band íslenskra kvik­mynda­fram­leið­enda (SÍK) saka RÚV um að blása út eign­ar­hlut sinn í aðkeyptu dag­skrár­efni. Með því að eign­ast eign­ar­hlut í verk­efn­unum fær RÚV hlut­deild í mögu­legum hagn­aði sem verður af þeim, sem fyrirtækið segist ætla­ að nota til að fjármagna inn­lenda dag­skrár­gerð. Kjarninn greinir frá.

SI og SÍK segja skilmálabreytingar á samningum RÚV við sjálfstæða framleiðendur hafa verið gerðar án aðkomu samtakanna. Breyt­ing­arnar sem um ræðir felast í að RÚV greiði nú fyrir bæði sýningarrétt og eignarhlut í dagskrárefni, en greiddi áður einungis fyrir sýningarrétt.

Samtökin segja eignarhlut RÚV blásinn upp með því að reikna framleiðslukostnað út frá heild­ar­kostn­aði, að frá­dreg­inni end­ur­greiðslu. Telja þau RÚV vera að teygja sig í fjár­magn sem ætlað sé sjálf­stæðum framleiðendum, með því að reikna end­ur­greiðslur inn í eign­ar­hlut sinn. 25 prósent endur­greiðsl­ur geta numið hund­ruðum millj­óna þegar um mjög stór verkefni er ð ræða.

Sig­ríður Mog­en­sen, sviðs­stjóri hug­verka­sviðs SI, hef­ur séð um málið fyrir hönd SI og SÍK. Hún segir í samtali við Kjarnann að mik­il­vægt sé að kom­ist verði að sátt um það hvernig aðkomu RÚV að fram­leiðslu dag­skrár­efnis verði háttað. Ætli RÚV að eign­ast hlut­deild í þeim verk­efnum sem það kaupi sýningar­rétt­inn að þurfi allir aðilar að kom­ast að sam­komu­lagi um hvernig eign­ar­hlut­ur­inn skuli reikn­að­ur.

Í samtali við Kjarnann segir Birgir Sig­fús­son, fram­kvæmda­stjóri miðla hjá RÚV, að fyrirtækið telji þetta fyr­ir­komu­lag fela í sér betri með­ferð á opin­beru fé en það fyr­ir­komu­lag að borga ein­ungis fyrir sýn­ing­ar­rétt.

Hann segir að RÚV hafi aldrei leit­ast eftir hlut­deild í end­ur­greiðsl­un­um. Þó hafi fyr­ir­tækið í ein­hverjum til­vikum reiknað eign­ar­hlut sinn í aðkeyptu dagskrár­efni að teknu til­liti til end­ur­greiðsl­unn­ar. Það sé þó ekki algilt verk­lag að sögn Birgis.

Kjarn­inn ræddi við aðila kvikmyndaiðnaðarins og telja þeir að RÚV sé ekki ein­ungis að seilast í opin­bert fjár­magn sem ætlað sé til að styðja við sjálfstæða kvik­mynda­gerð, heldur sé fyr­ir­tækið að reyna að fá meira fyrir minna. Þykir þeim óeðli­legt að fyr­ir­tæki í eigu hins opin­bera, sem fái fjár­magn af fjár­lögum hvers árs, sé að sækja í fjár­magn, sem ætlað sé til stuðnings sjálf­stæðum kvikmyndafram­leið­end­um, á þennan hátt.

Samkvæmt heimildum Kjarnans er að minnsta kosti eitt til­vik þar sem RÚV fór fram á að eign­ast 40 pró­senta hlut í verk­efni þrátt fyrir að greiða ein­ungis fimmtán pró­sent af heild­ar­kostn­aði við fram­leiðslu þess. Slíkur eign­ar­hlutur hleypur á hund­ruðum millj­óna. Birgir neitar því þó alfarið og segir að RÚV hafi aldrei farið fram á eða eign­ast svo stóran hlut í verk­efnum sem það hafi verið með­fram­leið­andi að.

Ítarlega fréttaskýringu Kjarnans um málið má lesa hér.