Fyrir ári síðan settu Samtök atvinnulífsins metnaðarfulla stefnu: Að Ísland verði á meðal 10 samkeppnishæfustu þjóða heims á nýjan leik innan 10 ára. Frá því að markmiðið var sett hefur Ísland færst upp um fjögur sæti á lista IMD yfir samkeppnishæfni þjóða. Landið er því fjórum sætum ofar á listanum en það var árið 2013 og fimm sætum ofar en árið 2010.
Þetta kemur fram í nýju riti SA, Gerum betur, sem kemur út á morgun í tilefni af ársfundi samtakanna. Þar segir jafnframt: "Við eigum þó enn langt í land með að ná fyrri stöðu okkar en árin 2004 og 2005 var Ísland í fjórða sæti listans. Samanburður IMD tekur til 60 landa og eru það Bandaríkin, Sviss og Singapore sem leiða hann að þessu sinni. Okkar helstu samaburðarlönd, Norðurlöndin, eru öll fyrir ofan okkur."
Ísland er nú í 25. sæti yfir samkeppnishæfni þjóða og telja samtökin það ólíðandi. Þau leggja til farsælt afnám hafta, mótun nýrrar peningastefnu og samstillta hagstjórn til að skila landinu fram veginn í þessum efnum. Tillögur SA hvað hagstjórnina varðar eru nýlunda: "Lagt er til að komið verði á fót sérstöku Þjóðhagsráði sem í eigi sæti oddvitar ríkisstjórnar á hverjum tíma, Seðlabankastjóri og forsvarsmenn aðila vinnumarkaðar. Ráðinu verði falið með lögum að fylgjast með þróun efnahagsstærða og bregðast við aðsteðjandi vanda. Þannig væri tryggt að mikilvægustu aðilar að hagstjórninni vinni að sömu markmiðum og axli sameiginlega ábyrgð á efnahagslegum stöðugleika."
Síðar segir: "Með þessu er brugðist við langvarandi efnahagslegum óstöðugleika sem er að mestu heimatilbúinn. Launabreytingar hafa yfirleitt ekki samrýmst verðstöðugleika, skort hefur aga í ríkisfjármálum og oftar en ekki hafa ríkisútgjöld magnað hagsveiflur. Seðlabankanum hefur síðan þurft að takast á við efnahagslegan veruleika með vaxtatækið eitt að vopni gegn verðbólgunni en án skipulegs stuðnings vinnumarkaðar eða ríkisfjármála."
