Einar Benediktsson hefur langa reynslu af utanríkisþjónustunni og var meðal annars sendiherra í París, London og Washington. Hann telur að vígbúnaður Rússa á norðurslóðum sé meiri nú en á tímum kalda stríðsins og bendir á að Rússar hafi með hernaðaraðgerðum sínum í Úkraínu rofið samkomulag um friðhelgi landamæra eftir kalda stríðið. Þá hafi þeir ógnað nágrannaþjóðum sínum í Evrópu, líka á norðurslóðum. Hann er í viðtali við RÚV um þetta efni og skefur þar ekki utan af hlutunum:
\"Það hefur ekki skort yfirlýsingar frá sjálfum forsetanum Pútín undanfarin eitt eða tvö ár um hvernig norðurslóðirnar Rússlandsmegin yrðu hervæddar, við Íshafið á Kólaskaganum,“ segir Einar og bætir við: \"Það voru settar aftur í gang herstöðvar, stórir flugvellir með þeim flugvélakosti sem til þurfti, herskipum, kafbátum og nýrri kynslóð af eldflaugum sem þeir hafa þróað. Svo hér fyrir norðan okkur er miklu meiri hernaðarógn, held ég, heldur en var á dögum kalda stríðsins.“
Sjávarútvegsfyrirtæki eru á meðal þeirra sem hafa gagnrýnt ríkisstjórnina fyrir að fylgja fordæmi Evrópusambandsins og Atlantshafsbandalagsins, og styðja refsiaðgerðirnar gegn Rússum. Einar telur ákvörðun stjórnvalda rétta, Íslendingar hafi skyldum að gegna í samstarfi sínu við önnur vestræn ríki. Evrópusambandið og Atlantshafsbandalagið hafi verið nauðbeygð til að svara hernaðaraðgerðum Rússa, og viðskiptaþvinganirnar séu lægsta stigið sem hægt hafi verið að beita: \"Þetta er að sjálfsögðu mál Íslendinga, því ekki getum við gert tilkall til þess að við séum varðir, varnarlaus þjóð, ef til kemur af bandalagsþjóðum okkar, ef við sinnum ekki samþykktum þeirra að öðru leyti,“ segir Einar í viðtalinu við RÚV.
