Meðlimur hópsins Matartips vakti í gær athygli á því sem henni fannst vera undarleg álagning með því að birta mynd af kvittun sem hún fékk á veitingastaðnum Sölku að lokinni máltíð.
Á kvittuninni sést að tekið var gjald fyrir hvert einasta álegg á hamborgaranum og kostaði grænmeti á borð við kál, tómat og lauk 150 krónur stykkið. „Ekki nóg með það þá kostaði það líka 150 krónur að taka af grænmeti eða ost!!“ skrifaði mataráhugamaðurinn og tók einnig fram að ekki hafi verið hægt að skipta út grænmeti.
Ekki látin vita af kostnaðinum
Téður aukakostnaður kom ekki fram á matseðli og ekki var látið vita um kostnaðinn á meðan pantanir fóru fram að sögn matargesta. „Mjög vafasamir viðskiptahættir og við munum ALDREI borða þarna aftur,“ ítrekaði mataráhugamaðurinn.
„Að viðbættu þá gleymdist einn rétturinn og kom mikið seinna eða þegar allir hinir voru að klára matinn.“
Vildu ekki endurgreiðslu
Færslan hefur vakið mikla athygli og hafa um 500 manns sett inn athugasemd um málið. Þá hafði veitingahúsið Salka samband við matargestinn og sagði að það hafi verið gerð mistök þegar rukkað var fyrir að fjarlægja álegg.
„Þau báðust afsökunar á þessu og buðust þar að auki til að endurgreiða okkur mismuninn sem við afþökkuðum. Ég tek það fram að við vorum ekki að fara fram á endurgreiðslu, þessi færsla var sett inn til að vekja athygli á undarlegri álagningu (að okkar mati)“
