Dyrnar á Þyrlu reykvískra lögreglumanna áttu að vera lokaðar, ekki opnar þegar haldið var af stað frá Siglufurði með meintan morðingja í sjöunda þætti Ófærðar.
Þar með er ráðgátan leyst hvað varðar mistök í útsendingu Ríkissjónvarpsins, en eins og kunnugt er var röng útgáfa af þættinum send út á sunnudagskvöld - og enda þótt strax hefði verið látið í veðri vaka að um smávægilegan mun hafi verið á efnistökum útgáfanna lék áhorfendum, sem eru ófáir, forvitni á að vita hvernig rétta útgáfan liti út.
Og niðurstaðan sást í útsendingu réttu útgáfunnar í gær: Auðvitað áttu dyrnar á þyrlunni að vera lokaðar þegar Sigurður, leikinn af Þorsteini Bachman, henti sér út úr þyrlunni undir lok þáttarins.
En þær voru opnar á sunnudag.
Lokaðar í gærkvöld.
Sá er munurinn.
