„Á Íslandi ríkir meiri ójöfnuður en í nokkru öðru menningarlandi milli þeirra sem fastir eru í krónuhagkerfinu og hinna sem eru frjálsir að því að standa utan þess. Hagfræðingar hafa bent á að þessi skipan mála leiðir til þess að gjáin milli þeirra sem eiga mest og hinna sem eiga minna breikkar stöðugt.“
Þetta segir Þorsteinn Pálsson fyrrverandi forsætisráðherra í pistli hér á Hringbraut. Fjallar Þorsteinn þar um umræðu um makrílfrumvarpið sem stjórnarandstöðuflokkarnir sameinuðust um að vera á móti. Þorsteinn vill sjá kerfisbreytingu í peningamálum og virkara erlent samstarf. Þorsteinn segir:
„Ríkisstjórn Katrínar Jakobsdóttur var í raun og veru mynduð fyrst og fremst til þess að standa vörð um þetta kerfi, sem er einn helsti áhrifavaldurinn um vaxandi ójöfnuð í eignaskiptingu. Stjórnarandstöðuflokkarnir þrír tala hins vegar í þá veru að á þessu sviði þurfi kerfisbreytingu til að jafna aðstöðumun.“
Bætir Þorsteinn við að ríkisstjórnarflokkarnir þrír kjósi óbreytt ástand sem eigi rætur að rekja til þrjátíu ára gamallar heimsmyndar.
„Nokkrir talsmenn ríkisstjórnarflokkanna veifa popúlískri Brexithugmyndafræði og eru kannski að því leyti nær nútímanum,“ segir Þorsteinn og bætir við: „Stjórnarandstöðuflokkarnir þrír standa augljóslega fjær þjóðernispopúlisma og virðast opnari fyrir dýpra evrópsku samstarfi með þeim þjóðum sem næst okkur standa í menningarlegum efnum. Þeir horfa einfaldlega fram frá sjónarhorni nýrrar heimsmyndar meðan ríkisstjórnin horfir til baka.“
Þá segir Þorsteinn: „Á báðum þessum sviðum á ríkisstjórn Katrínar Jakobsdóttur hugmyndafræðilega samleið með Miðflokknum.“
Hér má lesa pistil Þorsteins í heild sinni.
