\"Hvernig er hægt að láta manneskju í fæðingarorlofi með barn vera með tekjur sem eru mun lægri en lágmarkstekjur,\" spyr Bergljót Klára Benjamínsdóttir, nýbökuð móðir sem fær 85 þúsund krónur útborgaðar úir Fæðingarorlofssjóði á mánuði.
Bergljót Klara segir sögu sína í Fréttablaðinu í dag en hún fæddi son sinn í byrjun júlí, ári eftir að hafa klárað stúdentspróf og var samhliða því námi í 25% vinnu fram á vorið 2014. Sú vinna komi nú niður á orlofsupphæðinni, á móti komi að ekkert tillit sé tekið til þess að hún var í námi á þeim tíma.
Hún segir niðurstöðuna í sínu tilviki vera þessa: \"Ég hefði alveg eins getað sleppt því að sækja um fæðingarorlof, sagt upp vinnunni og farið á atvinnuleysisbætur,\" segir hún við blaðið og bendir á að kynsystur hennar í Noregi búi við allt aðrar aðstæður. Þær fái 100% orlof í tólf mánuði og barnið komist að því búnu inn á leikskóla. Ísland sé á allt öðrum stað. Hún hafi reynt að vera eins dugleg að vinna og hún gat með námi, en ríkið vilji ekki svoleiðis háttalag; það vilji frekar hafa fólk á bótum.
