Athygli hefur vakið að Reykjavíkurborg hefur deilt færslu um ágæti Hafnartorgs á nokkrar íbúagrúppur á Facebook.
Í færslunni má sjá myndir af Hafnartorgi frá því áður en nýbyggingarnar sem hýsa meðal annars verslanir H&M og skrifstofu Hringbrautar voru reistar og svo nýjar myndar af núverandi götumynd. Skiptar skoðanir eru um ágæti þessara bygginga og hafa ýmsir málsmetandi aðilar í þjóðfélaginu tjáð sig um málið, þar á meðal dagskrárgerðarmaðurinn Egill Helgason sem skrifar:
„Glötuð tækifæri til að gera eitthvað fallegt og skemmtilegt – í sátt við byggðina.“
Almannatengillinn Andrés Jónsson tekur þó í andstæðan streng og segist vera mjög ánægður með framkvæmdirnar á Hafnartorgi:
„Stórfelldar framfarir. Höfnin verður bráðum aftur einkennismerki Reykjavíkur og Kvosin aaðalsvæðið.“
Kuldalegt rokrassgat
„Mér finnst furðulegt að skyggja svona á sjóinn...þetta er svo lítil borg stútt full af sjarma, hefði viljað sjá torg sem höndlar rok, sem skyggir ekki á aðra bygð og höfðar til “litlu” búðirnar,“ segir Gígja Sara Björnsson, eigandi Kattakaffihússins og bætir við að hún hefði frekar viljað sjá húsnæði sem væri auðvelt að leigja út til kaffihúsa, veitingastaða og lítilla verslana.
„Það hefði að mínu mati gert þetta mun huggulegra oh meira “íslenskt” torg. Núna finnst mér þetta afar kuldalegt og algjört rokrassgat en svo aðalega væri svo gaman að hafa meira líf og meiri atvinnumöguleika,“ segir Gíga Sara.
Færslunni hefur verið deilt í að minnsta kosti þrjár íbúagrúppur á Facebook, Íbúar í Grafarvogi, Vesturbæinn og Langholtshverfi – 104, og hafa sumir sett spurningamerki við það að Reykavíkurborg sé að seilast inn á slíkar grúppur til að stæra sig af eigin afrekum
Björn Teitsson, upplýsingafulltrúi Krabbameinsfélagsins og borgarskipulagsfræðingur, skrifar til að mynda:
„Frekar lélegur lestur á salnum að monta sig af þessu akkúrat núna.“
