Dalamaður ársins Rebecca Cathrine Kaad Ostenfeld segist sár yfir því að hafa ekki fengið símtal frá einum einasta forsvarsmanni Samkaupa í kjölfar uppsagnar hennar í Krambúðinni í Búðardal.
Rebeccu var sagt upp störfum í Krambúðinni í Búðardal á mánudag eftir að hafa starfað þar í þrettán ár. Ástæða uppsagnarinnar var sögð skipulagsbreyting en yfirmaður hennar segir hana hafa talað of mikið.
Fréttablaðið hafði í gær eftir Gunni Líf Gunnarsdóttur, framkvæmdastjóra Mannauðs-og samskiptasviðs Samkaupa að standa hefði mátt betur að uppsögn Rebeccu. Samkaup hyggðust draga lærdóm af málinu.
Þá sagði Gunnur að hún hefði heyrt í Rebeccu til að heyra hennar hlið. Rebecca segir einungis um hafa verið að ræða Facebook skilaboð og segist sárt sakna þess að heyra nokkuð í forsvarsfólki Samkaupa.
Rebecca segir að hún vilji fyrst og fremst leiðrétta það að fyrirtækið hafi haft samband við sig líkt og haldið hafi verið fram.
„Enginn í fyrirtækinu hefur raunverulega rætt við mig og samskiptin eru bara frosin. Ég veit ekkert hvað ég vill annað en bara það að það sé ekki logið vegna þessa máls. Þá er nú betra að segja ekki neitt frekar en að ljúga.“
Rebecca segist meyr yfir stuðningi sem hún hafi fundið fyrir í samfélaginu. „Síminn hefur ekki stoppað. Ég er mjög þakklát.“
Umfjöllunina má lesa í heild sinni á vef Fréttablaðsins.
