Mæðgin lentu í leiðinlegri lífsreynslu þegar þau voru á ferð um Snæfellsnes þar sem þau voru í sumarfríi. Þau Magnús Secka og Sara Magnúsdóttir tóku eftir að einhver hafi límt límmiða á hliðarspegil á bíl þeirra eftir að þau höfðu stoppað á Vegamótum í Snæfellsnesi.
Á límmiðanum stóð: „If you are black or brown please leave this town“ eða „Ef þú ert brúnn eða svartur vinsamlegast farðu úr bænum.“
Hatursglæpur annars staðar en á Íslandi
Í samtali við Fréttablaðið segir Magnús þetta hafa verið skrítna og óhugnanlega lífsreynslu. Móðir hans Sara segir verknaðinn flokkast sem hatursglæp annars staðar í heiminum og vonast til þess að þeir seku náist.
Þau Sara og Magnús rétt litu inn á Vegamót í örfáar mínútur en á meðan tóku óprúttnir aðilar sig til og límdu límmiðann á hliðarspegilinn, þeim megin sem Magnús sat. „Þetta er snarlasið og þegar maður fer að spá í því, mjög óþægilegt og ferlegt bókstaflega,“ segir Sara um málið á Facebook.
Hún segir þrjá Íslendinga hafa staðið fyrir utan sjoppuna þegar þau fóru inn, fáir hafi verið á svæðinu en segist þó ekki geta sagt til um hverjir voru þarna að verki. „Það þarf að berjast gegn þessu og það má mögulega rekja þetta ef grennslast er fyrir kringum þessa síðu hvernig þetta gerist einfaldlega,“ segir Sara og hvetur fólk til að deila færslunni sem víðast.
