Forkólfar Bankasýslu ríkisins gagnrýna stjórnendur Landsbankans harðlega fyrir söluna á hlut sínum í Borgun, en á fundi fjárlaganefndar í gærmorgun kom fram hjá þeim að setja hefði átt hlutina í opið söluferli; rökstuðningur bankans fyrir því öndverða sé allsendis ófullnægjandi.
Í máli forráðamanna Bankasýslunnar kom jafnframt fram að sú leið sem farin var við umrædda sölu hafi valdið bankanum tjóni og skert trúverðugleika og traust bankans. Telja þeir það vera alvarlegt mál og leggja áherslu á að Landsbankinn endurheimti traust eigenda sinna, viðskiptavina og fjárfesta sem og almennings - og hafa í því efni óskað eftir tillögum af hálfu bankans í þá veru.
Í bréfi sem Bankasýslan hefur sent fjármálaráðherra segir orðrétt að það sé niðurstaða athugunar Bankasýslunnar að \"sölumeðferðin hafi varpað verulegum skugga á árangur Landsbankans undanfarin misseri og að fagleg ásýnd bankans og stjórnenda hans hafi beðið hnekki.“
Í bréfinu segir ennfremur að bankaráð Landsbankans verði að grípa til viðeigandi ráðstafana til að endurheimta það traust sem bankinn tapaði vegna sölumeðferðarinnar: \"Fer stofnunin fram á að hluthöfum í Landsbankanum hf. verði hið fyrsta gerð grein fyrir því með hvaða hætti bankaráðið telur rétt að bregðast við og ekki síðar en tveimur vikum fyrir aðalfund sem fram fer þann 14. apríl nk.“
