Fjármálastöðugleikanefnd Seðlabankans hefur sett reglur um hámark greiðslubyrðar húsnæðislána, á það að vinna á móti aukinni skuldsetningu heimila að undanförnu vegna fasteignakaupa. Nú má greiðslubyrði fasteignalána almennt ekki fara yfir 35 prósent af ráðstöfunartekjum neytenda.
Ragnar Þór Ingólfsson, formaður VR, segir seint í rassinn gripið í færslu á Facebook: „Eftir stjórnlausa þenslu á fasteignamarkaði sem ætla má að sé að stórum hluta vegna þess að ekki var farið í mótvægisaðgerðir í kjölfar mikilla vaxtalækkana, og áhrif þeirra á húsnæðismarkað, fer Seðlabankinn í mótvægisaðgerðir þegar skaðinn er skeður. Mótvægisaðgerðir við afleiðingum eigin aðgerðarleysis.“
Hann segir að staða viðkvæmra hópa á húsnæðismarkaði verði gerð enn verri og þeim sem tóku óverðtryggð lán á breytilegum vöxtum verði refsað með vaxtahækkunum. „Miklu fleiri leiðir hefðu verið skynsamlegri til að bregðast fyrirsjáanlegum vanda en að horfa á allt fara úr böndunum og bíða eftir að ballið er búið.“
Gunnar Smári Egilsson reiknar út að fólk á lágmarkslaunum hafi þá efni á að greiða tæpar 99 þúsund krónur á mánuði.
„Miðað við lánareiknivél Landsbankann er það greiðslubyrði af 21,6 m.kr. verðtryggðu láni á móti 27 m.kr. fasteign, þegar leitað er að vaxtakjörum m.v. 80% veðhlutfall. Þessi fasteign er að sjálfsögðu ekki til. Seðlabankinn er að segja á láglaunafólk eigi ekkert erindi á húsnæðismarkaðinn, hann sé fyrir annað fólk.“
Gunnar Smári segir að láglaunafólkið fari á leigumarkaðinn þar sem það borgi 200 þúsund krónur að lágmarki á mánuði.
„Kerfið er þá þannig að ef þú ert með lágar tekjur þá mátt þú ekki skulda nóg til að standa undir húsnæðiskaupum. Þú verður þá að fara á leigumarkaðinn þar sem þú borgar tvöfaldan kostnað til leigusala, sem Seðlabankanum finnst betra að eigi eignina. Þú borgar hins vegar allan lánakostnað hans plús feitan arð til hans til viðbótar, kannski 50 þús. kr. á mánuði aukalega.“
Hann segir að Seðlabankinn búi til fjármálakerfi sem ýti enn frekar undir fjáraustur þeirra sem lítið sem ekkert eiga til þeirra sem mikið eiga og aldrei fá nóg. „Seðlabankinn er tæki í höndum hinna auðugu. Með aðgerðum sínum margfaldaði Seðlabankinn auð þeirra í kórónafaraldrinum og hann ætlar að halda áfram að þjóna þessu fólki áfram.“
Hann sakar svo Ásgeir Jónsson Seðlabankastjóra um að stunda nýfrjálshyggju.
„Um daginn hafði Seðlabankinn skoðun á lagningu Sundabrautar. Hefur hann skoðun á húsnæðisskorti lágtekjufólks og óheyrilegum húsnæðiskostnaði þess á leigumarkaði? Ó, nei. Hann telur það ekki sitt vandamál. Sjálfur býr hann vel.“
