Að því er fram kom á fréttavef RÚV rétt áðan var rafmagn að komast á Austfirði hvern af öðrum, og einnig er komið rafmagn á Egilsstaði. Rafmagn fór af Stuðlalínu 1 milli Hryggstekks á Héraði og Stuðla í Reyðarfirði annars vegar, og Eyvindarárlínu 1, milli Hryggstekks og Eyvindarár á Egilsstöðum hins vegar. Enn er verið að leita orsakar, en maður hefur verið sendur á vettvang til að kanna aðstæður í tengivirkinu á Hryggstekk á Héraði.
Á Austurlandi hafði annars allt gengið nokkurnveginn slysalaust fram að því. Nokkrar truflanir og útleysingar urðu eystra og Hafnarlína milli Hóla og Hafnar í Hornafirði datt út um stund en er komin í samband á ný. Sömu sögu er að segja af Vestur-Skaftafellssýslu, þar sem rafmagnslaust var skamma stund. Helst höfðu menn áhyggjur af byggðalínunni á suðausturhorninu, og línum milli fjarða fyrir austan, en allt hefur þetta sloppið til fram til þessa og í raun orðið mun minni truflanir en óttast var.
Þá er rafmagnslaust á norðanverðum Vestfjörðum, eftir að útleysing varð á flutningslínu milli Breiðadals og Ísafjarðar rúmlega hálf ellefu.
Uppfært: Rafmagn er nú komið á víðast hvar um landið.
