Breska raunveruleikastjarnan og tískugúrúinn Tan France, sem þekktastur er fyrir framkomu sína í Netflix-þáttunum Queer Eye, er staddur hér á landi ásamt eiginmanni sínum, listamanninum Rob France. Hjónin hafa birt nokkrar myndir úr ferðalaginu á Instagram-síðum sínum en þeir eru staddir hér til að fagna væntanlegu barni sem þeir eru að fara að eignast með hjálp staðgöngumóður.
Í gær birti Tan til dæmis skemmtilega mynd af sér við Seljalandsfoss með fyrirsögninni „Tveir fossar, einn gaur. Það er er brandari þarna einhvers staðar.“ Hátt í 160.000 manns hafa líkað við myndina og rúmlega 500 hafa skrifað athugasemd við hana, þar á meðal kollegi Tan úr Queer Eye, hárgreiðslumaðurinn hýri, Jonathan Van Ness, sem skrifar:
„Tveir fossar, einn gaur og RISASTÓR … persónuleiki,“ og lætur fylgja með nokkur tjákn svo brandarinn fari ekki á milli mála.
Þá birti Tan einnig mynd fyrir tveimur dögum þar sem hann sést slaka á í náttúrulaug í miðnætursólinni. Undir þá mynd skrifar hann „‘Ooh Heaven is a place on Earth‘ Þetta var tekið rétt eftir MIÐNÆTTI. Hvað í hvaðinu??!!“ og vitnar þar í eitt þekktasta popplag níunda áratugarins Heaven Is a Place on Earth með Belindu Carlisle.
France hjónin virðast vera að njóta þess besta sem náttúrufegurð Suðurlands hefur upp á að bjóða því Rob birti einnig myndaseríu á sinni Instagram-síðu þar sem hann og Tan stilla sér upp við Gullfoss.
Það má því með sanni segja að tveir nýir Íslandsvinir hafi bæst í hóp þeirra fjölmörgu Hollywood stjarna sem heillast hafa af landi og þjóð.
