Píratar lögðu fram í fimmta sinn þingsályktunartillögu þess efnis um að fela sjávarútvegs- og landbúnaðarráðherra að útbúa aðgerðaráætlun um innleiðingu kjötræktar. Kjötrækt er tækni sem felur í sér að framleiða kjöt án þess að slátra þurfi dýri. Þetta kom fram á vef Fréttablaðsins. Í þessu felst að í stað þess að framleiða heilt dýr er einungis ræktaður sá hluti dýrsins sem ætlunin er að nýta.
Björn Leví Gunnarsson, þingmaður Pírata, segir í samtali við Fréttablaðið að öll umræða um tæknina sé jákvæð. Tæknin geti leyst af hólmi verksmiðjuframleiðslu á kjöti. Þá muni það einnig leysa ýmis vandamál sem fylgja núverandi framleiðslukerfi á matvælum.
„Verksmiðjuframleiðsla á dýrum til manneldis eða annarrar notkunar er frekar sóðaleg,“ segir Björn og viðurkennir að skrefið úr hefðbundnum landbúnað yfir í kjötrækt yrði erfitt og að pólitískur vilji yrði að vera til staðar. Aðspurður um hvort hann hafi ekki áhyggjur af skoðun bænda svaraði hann:
„Það var grein í Bændablaðinu fyrir nokkrum árum þar sem talað var um ræktað kjöt og það var mjög flott grein,“ segir Björn og bætir við að kjötrækt sé framtíðin. Að eftir hundrað ár muni öllum finnast fáránlegt að framleiða dýr í verksmiðjum.
„Ég lít á þetta eins og vínrækt eða að brugga bjór þar sem hver bóndi væri að rækta sína útgáfu af kjúklingalæri eða nautalund.“
