Tónlistarmaðurinn Pétur Örn Guðmundsson, betur þekktur sem Pétur Jesú, hefur verið rekinn úr hljómsveitunum Dúndurfréttum og Buff, en hann hefur hingað til verið söngvari sveitanna beggja.
Þetta var tilkynnt fyrr í dag á Facebook síðum hjlómsveitanna tveggja. Engar frekari skýringar voru gefnar á þessum tíðindum en samkvæmt heimildum Hringbrautar er Pétur maðurinn sem Elísabet Ormslev ræðir í viðtali við Fréttablaðið í dag.
Elísabet nefnir ekki nafn, en lýsir eitruðu sambandi við tónlistarmann sem hófst þegar hún var aðeins 16 ára. Hún segir hann hafa haldið sér í heljargreipum í áratug frá því hún var á fyrsta ári í menntaskóla.
Yfirlýsingar hljómsveitanna á Facebook eru stuttar. Á vegg Dúndurfrétta segir eingöngu: „Pétur Örn er ekki lengur hluti af Dúndurfréttum og verður ekki hluti af framtíðarverkefnum.“
Tilkynning Buff er einnig stutt: „Hljómsveitin Buff hefur slitið samstarfi við söngvara sveitarinnar.“
