Páll Matthíasson, forstjóri Landspítalans fagnar ákvörðun stjórnvalda á lokametrum fjárlagaumræðunnar að hækka framlög til spítalans um á annan milljarð króna. Hann segir niðurstöðuna vera ánægjulega þótt áfram þurfi að horfa í hverja krónu.
Spítalinn fær tímabundna 1.000 milljóna króna fjárveitingu til að bæta úr fráflæðisvanda Landspítalans, en hugsunin er sú að fjármununum verði varið í ýmis úrræði til að létta á starfsemi spítalans. Þá var einnig ákveðið að veita 250 milljónum króna til að auka viðhaldsframkvæmdir á húsnæði spítalans. Að sögn Guðlaugs Þórs Þórðarsonar, fyrsta varaformanns fjárlaganefndar, er framlagið m.a. ætlað til framkvæmda á endurhæfingardeildinni á Grensási.
\"Þetta eru 250 milljónir sem fara í viðhald en síðan fer milljarður í það að taka sérstaklega á þessum fráflæðisvanda á Landspítalanum þannig að hann geti sinnt betur hlutverki sínu sem bráðasjúkrahús,“ segir Guðlaugur um fjárveitingarnar í samtali við Morgunblaðið í dag.
Hann segir margar leiðir til að taka á vandanum og að fjármunirnir séu ætlaðir í þau úrræði: \"Það eru þarna hlutir eins og að nýta öll þau hjúkrunarrými sem eru til staðar, skammtímaúrræði og öflugri heimaþjónusta, þannig að fólk geti verið lengur heima hjá sér.“
