\"Ég held að þessar kosningar verði mjög sögulegar. Þetta eru óvenjulegustu forsetakosningar á lýðveldistíma,“ segir Björg í samtali við RÚV í gærkvöld. Hún veltir upp þeirri spurningu hvern Íslendingar vilji sem forseta og ekki síður fyrir hvað sá forseti eigi að standa.
\"Ætlum við að hverfa aftur til hugsunarinnar um að hann eigi að vera einhverskonar sameiningartákn? Sem stendur fyrir íslenska menningu og sögu. Einhver sem sameinar þjóðina. Eða ætlum við taka þann kúrs, eða halda þeim kúrs, að þarna sé pólitískur valdhafi sem hefur sterkt og virkt aðhald með þinginu? Vegna þess að nú er traust þingsins í miklu lágmarki. Ætlum við nú að ýta undir eða styrkja stöðu forseta sem gæslumanns þingsins? Um þetta munu kosningaumræðurnar snúast,“ segir hún við fréttastofuna
Björg segir reglusetningu um forsetakjör að mörgu leyti úrelta. Það muni einnig móta kosningarnar: \"Það er afskaplega einfalt að bjóða sig fram. Það eru lágir þröskuldar, 1.500 meðmælendur. Árið 1944 voru 75.000 manns á kjörskrá. Núna eru 235.000 á kjörskrá og þetta lágmark er enn óbreytt.“
Björg segir þá stöðu geta komið upp að tíu manns verði í forsetakjöri.\"Við gætum verið í þeirri stöðu að sá sem nær kjöri sé með 10% atkvæða. Þetta er líka einstakt fyrir okkar skipulag. Þ.e.a.s. að tryggja ekki að það sé meirihluti á bak við forseta þjóðarinnar,“ sagði lagaprófessorinn í samtali við RÚV í gærkvöld.
