Hættan af því að viðkvæm krónan byrji að falla við afnám gjaldeyrishaftanna kallar væntanlega á verulegar vaxtahækkanir. Þetta er mat margra hagfræðinga sem hafa rýnt í mögulegar afleiðingar af losun haftanna sem stjórnvöld hafa boðað á þessu ári. Það þýðir mun lakari samkeppnisstöðu íslenskra fyrirtækja og gæti haft mikil áhrif á gerð kjarasamninga. Á það hefur verið einnig bent að þar eð krónueign Íslands nægi ekki fyrir eignum kröfuhafa hér á landi kunni það að leiða til seðlaprentunar sem enn veiki gengi krónunnar og felli það að lokum.
Leiðin út úr höftunum er ekki einasta viðkvæm heldur mun flóknari en áður var talið. Þetta er mat margra þeirra sérfræðinga sem hafa tjáð sig um málið á síðustu dögum. Sjálf krónan er í húfi og þar með sgtaða stjórnarinnar, skrifar Þorsteinn Pálsson um í pistli sínum hér á hringbraut.is. Ingólfur Bender, forstöðumaður greiningardeildar Íslandsbanka telur í Morgunblaðinu í dag að afnám hafta muni taka langan tíma þar sem farið verði í skrefum úr einu haftaumhverfi í annað,
Málið var rætt á fundi efnahags- og viðskiptanefndar Alþingis í gær, en það hefur verið í nokkru uppnámi eftir að Sigmundur Davíð Gunnlaugsson lýsti því yfir á landsfundi Framsóknarmanna um helgina að til stæði að setja sérstakan útgönguskatt á eignir kröfuhafa gömlu bankanna, sem hann raunar kallaði stöðugleikaskatt. Einhugur er ekki innan stjórnarflokkanna um þá leið eins og komið hefur á daginn eftir yfirlýsingar formanns Framsóknarflokksins.
Það er svo til marks um flókna stöðu málsins að Lee Bucheit hefur verið fenginn til að ráðleggja forsætisráðherra og fjármálaráðherra í málefnum gjaldeyrishaftanna en þeir sátu langan fund með honum í gærdag um leiðir út úr höftunum sem alls ólóst er hvort verði færar á næstunni; allt heila málið, sem er viðkvæmt, flókið og áhættusamt þarf þinglega meðferð og fáir þingdagar til stefnu.
