Kristrún Frostadóttir, þingkona Samfylkingarinnar, gagnrýndi ríkisstjórnina fyrir viðbrögð hennar við gríðarlegum verðhækkunum vegna stríðsins í Úkraínu. Þetta sagði hún í pistli sem birtist á Vísi í dag.
Hún segir að Svíþjóð, Bretland, Frakkland og Noregur hafi kynnt mótvægisaðgerðir. Hún segir ríkisstjórnina lengi að bregðast við og segir það gert til að fría sig af pólitískri ábyrgð.
„Ég fæ déjà vu – sama staðan er nú komin upp og fyrir 2 árum síðan þar sem öll nágrannalönd okkar kynntu hratt og örugglega mótvægisaðgerðir vegna COVID en hér var fólki og minni fyrirtækjum beint í skuldsetningu, fyrirtækjum borgað fyrir að segja fólki upp og alvöru aðgerðir komu ekki fram fyrr en mörgum mánuðum of seint. Í millitíðinni byggðist upp gríðarlegt ójafnvægi í kerfinu. Ójafnvægi sem almenningur líður fyrir í dag í formi gríðarlegra húsnæðisverðshækkana, þar sem fjármagni var dreift með mjög ómarkvissum hætti í gegnum bankakerfið. Allt gert til að fría sig pólitískri ábyrgð á ákvörðunum og afleiðingum.“
Kristrún segir stjórnarflokkana vísa til langtímaáætlunum sem eigi að skila sér með vorinu, sem hún segir of seinlegt þar sem verðbólguþrýstingur aukist án aðgerða.
„Þetta er ekkert annað en pólitísk ákvarðanafælni, pólitískur verkkvíði. Sem bitnar á almenningi í landinu. Hið kaldhæðnislega er að þetta mun líka bitna á ríkissjóði þegar líður á árið ef hér fer af stað víxlverkun launa- og verðlags því ríkisstjórnin skilur ekki hvaða hlutverki ríkissjóður hefur að gegna í velferðarsamfélagi. Skilur ekki mikilvægi þess að fara í sértækar aðgerðir til að draga úr þrýstingi og þenslu síðar meir. Ef ekkert er að gert, verða afleiðingar þessa aðgerðarleysis þær sömu og fyrir 2 árum síðan: aukið ójafnvægi í efnahagslífinu, aukinn verðbólguþrýstingur og aukinn kostnaður ríkissjóðs fyrir vikið.“
