Óttarr Proppé er nýr formaður Bjartrar framtíðar en hann bauð sig einn fram í starfann og var því sjálfkjörinn á ársfundi flokksins í dag. Hann segir þessa upphefð vera mikinn heiður fyrir sig.
\"Ég vil leggja áherslu á að okkar gildi og grunnhugsun verði skýrari, þar með er ég ekki að segja að ég upplifi að við höfum ekki verið að starfa í anda hennar heldur kannski þurfum við að vera skýrari þegar við höfum verið að gera það. Ég og aðrir í forystunni þurfum líka að hjálpa þessari þróun áfram að koma mönnum betur saman, að auka samtalið og stytta boðleiðirnar í samtalinu. Við þurfum að skýra fyrir almenningi, sem er kannski ekki að átta sig almennilega á okkur, fyrir hvað við stöndum,“ segir Óttarr við mbl.is í dag og bætir við: \"Þessi áhersla okkar á að starfa öðruvísi í pólitík, okkur er alvara með henni en við höfum kannski tekið henni full alvarlega í okkar störfum og leyft öðrum að skilgreina okkur.“
Aðspurður um hvernig hann sjái fyrir sér að flokkurinn þróist og þroskist undir hans stjórn segir Óttarr við fréttavefinn að hann líti alls ekki á sig sem eina stjórnandann og það sé mikilvægt að starfa eftir því. Að í stjórnunarteyminu séu meðal annars tveir formenn, þingflokksformaður og forystumenn í sveitarstjórnum. Hann segir að hlutverk flokksins sé að virkja almenning, ekki bara rétt fyrir kosningar, til þess að taka þátt í stjórnmálum þó enginn verði neyddur til þess. Almenningi þurfi þó að líða eins og hann sé velkominn í heim stjórnmálanna.
