Prófessor í íslensku við Háskóla Íslands gagnrýnir harðlega samræmd próf 10. bekkjar í íslensku. Í fyrradag birti prófessorinn, Eiríkur Rögnvaldsson, færslu á eigin fésbók þar sem hann segist þó ekki eiga orð eftir að hafa skoðað samræmt próf 10. bekkjar í íslensku.
„...eða sér einhver hvað er athugavert við setninguna \"Hundraða er saknað eftir að ferja sökk seint í gærkvöldi\"?“
Hann bendir á að af 25 málfræðispurningum gangi 12 út á að hanka nemendur á einhvers konar \"villum\". Þágufallssýki komi fjórum sinnum fyrir (\"hlakka\", \"minna\", \"syfja\", \"vanta\"), \"hvor annar\" einu sinni, \"ég vill\" er auðvitað með, tvö dæmi um ia-stofna (\"Þórirs\" í eignarfalli, \"Reynir\" í þolfalli), \"einkanir\" fyrir \"einkunnir\", \"Guðnýju\" í eignarfalli, og svo nýja þolmyndin.
„Allt eru þetta atriði sem er búið að hamra á í marga áratugi (nema kannski tvö þau síðastnefndu sem þó eru ekki ný). Þau segja ekki neitt um almenna málkunnáttu og málbeitingu. Það er móðgun við bæði kennara og nemendur - og íslenskt mál - að þessi atriði skuli vera nærri helmingur af málfræðispurningum prófsins (ekki það að hinn helmingurinn sé eitthvað til að hrópa húrra fyrir).“
Í nýrri færslu á fésbók í dag segir Eiríkur að 7. bekkjar prófið sé síst betra.
„Einn hluti þess, 20 spurningar, hefur yfirskriftina \"Málnotkun\" - sem er algert öfugmæli því að þetta snýst mest um málfræðilega greiningu orða sem hefur ekkert með málnotkun að gera.
\"Hvert þessara orða er eins í eintölu og fleirtölu?\", \"Hvert undirstrikuðu orðanna er í hvorugkyni og þágufalli?\", \"Hvaða orðflokki tilheyrir undirstrikaða orðið?\", \"Hvernig er undirstrikaða orðið í karlkyni, fleirtölu, nefnifalli?\", \"Hvernig er nafnorðið \"hnöttur\" í eignarfalli fleirtölu?\", o.s.frv. 13 spurningar af 20 eru af þessu tagi.
Þar að auki eru tvær spurningar um \"gott mál\" - önnur skylduspurningin um \"langa\", \"vanta\", \"hlakka\" og \"kvíða\", hin um eignarfall mannanafna (er hægt að gefa rangt fyrir að segja að eignarfallið af \"Magnús\" sé \"Magnúss\"? Hvað ef börnin hafa nú lesið Magnúss sögu berfætts?). Svo er líka spurt hvað skammstöfunin \"t.a.m.\" merki. Mér finnst nú eiginlega ekki hægt að ætlast til þess að 12 ára krakkar viti það.
Það þarf enginn að vera hissa á því að börnunum finnist íslenska leiðinleg og sæki frekar í enskuna,“ skrifar prófessorinn ómyrkur í máli.
