Í leiðara Fréttablaðsins í dag fjallar Ólöf Skaftadóttir, ritstjóri blaðsins, um innleiðingu þriðja orkupakkans. Sem kunnugt er hófust þingstörf að nýju í gær með aukafundi, þar sem síðari umræða um þriðja orkupakkann fór fram. Umræður halda áfram í dag og atkvæðagreiðsla um málið fer fram á mánudaginn 2. september.
Ólöf segir: „Hlé var gert á þingstörfum í byrjun júní og þar með ákveðið að draga einhverja þá langdregnustu þingsályktunartillögu sem sögur fara af enn á langinn. Fjármálaráðherra og formaður Sjálfstæðisflokksins sagði við tilefnið of auðvelt að taka þingið í gíslingu en þingmenn Miðflokksins höfðu, líkt og frægt er orðið, haldið uppi miklu málþófi dagana áður.“
Hún bendir á að í umræðunum í gær hafi ekkert nýtt komið fram, þrátt fyrir að Sigmundur Davíð Gunnlaugsson, formaður Miðflokksins, hafi við samkomulag um hlé á þingstörfum sagt að loks gæfist ráðrúm til að skoða mál tengd orkupakkanum betur.
Ólöf listar upp aðalatriði málsins:
„1. Með innleiðingu orkupakka þrjú er ekkert vald framselt til erlendra stofnana.
2. Ekkert í orkupakka þrjú skuldbindur Íslendinga til að leggja eða samþykkja sæstreng.
3. Íslenska ríkinu er í sjálfsvald sett hvort áfram verði virkjað hér landi, hvað sem orkupakkanum líður.
4. Erfitt er að sjá hvernig verið sé að fara gegn stjórnarskránni með innleiðingunni.
5. Innleiðing pakkans mun ekki leiða til hærra orkuverðs, nema síður sé.
6. Með orkupakka þrjú er ekki verið að skylda hið opinbera til þess að einkavæða raforkustofnanir.“
Hún segir að með þessi atriði í huga sé erfitt að sjá frá hverju nákvæmlega andstæðingar orkupakkans vilja undanþágu, nema þeir vilji hreinlega undanþágu frá alþjóðasamstarfi. „Engu er líkara en að menn slái vísvitandi ryki í augu fólks. Í alvöru könnunum þar sem spurt hefur verið um málið hefur komið í ljós að margir landsmenn vilja ekki að Alþingi samþykki orkupakkann. Þar kemur einnig fram að meirihluti landsmanna hefur ekki kynnt sér málið eða kynnt sér það illa. Sérstaka athygli vekur að stuðningur við pakkann eykst eftir því sem fólk hefur kynnt sér málið betur.“
Ólöf kallar að lokum eftir því að kjörnir fulltrúar fari rétt með staðreyndir mála. „Sennilega voru það stór mistök af hálfu ríkisstjórnarinnar að framlengja bullið og afgreiða ekki málið strax í vor. Hættan er að fólk fari að trúa rangfærslunum eftir því sem þær eru oftar þuldar upp. Ekki þarf að líta langt yfir hafið til að sjá stjórnmálamenn í æðstu embættum sem skeyta engu um sannleikann.“
