Ólöf taki við varaformannsembætti

Gríðarlegur þrýstingur hefur skapast á Hönnu Birnu Kristjánsdóttur, varaformann Sjálfstæðisflokksins, að hætta við að bjóða sig áfram til varaformanns á Landsfundi Sjálfstæðisflokksins sem hefst eftir rúmar þrjár vikur. Í yfirlýsingu sem tíu núverandi og fyrrverandi forystumenn Sjálfstæðisflokksins víða um land hafa sent er skorað á Ólöfu Nordal að bjóða sig fram til varaformanns. Nöfn þeirra tveggja hafa einkum verið í umræðunni til þessa eins og sagt var frá í fréttaskýringu Hringbrautar á dögunum.

 „Án þess að á nokk­urn sé hallað telj­um við Ólöfu vera hæf­asta sjálf­stæðismann­in á land­inu öllu til að leiða flokk­inn, ásamt Bjarna Bene­dikt­syni for­manni, segir m.a. í stuðningsyfirlýsingu tímenninganna. Þeir eru Ásbjörn Ótt­ars­son, fyrr­ver­andi alþingismaður, Snæ­fells­bæ, Ásdís Snót Guðmunds­dótt­ir, formaður Sjálf­stæðis­fé­lags Arn­arfjarðar, Berg­lind Sig­urðardótt­ir, formaður Sjálf­stæðis­fé­lags­ins í Hvera­gerði, Böðvar Sturlu­son, Stykk­is­hólmi, formaður kjör­dæma­sam­taka ungra sjálf­stæðismanna í NV kjör­dæmi, Guðmund­ur Jón Helga­son, formaður Sjálf­stæðis­fé­lags Seltirn­inga, Haf­dís Gunn­ars­dótt­ir, formaður Sjálf­stæðis­fé­lags Ísa­fjarðar, Hjört­ur Sig­urðsson, formaður Sjálf­stæðis­fé­lags­ins á Pat­reks­firði, Magni Þór Harðar­son, formaður full­trúaráðs Sjálf­stæðis­flokks­ins í Fjarðabyggð, Pét­ur Ottesen, formaður full­trúaráðs Sjálf­stæðis­flokks­ins á Akra­nesi og Sölvi Sól­bergs­son, formaður full­trúaráðs Sjálf­stæðis­flokks­ins í Bol­ung­ar­vík.

Í samtali við Hringbraut sagði Hanna Birna fyrir nokkrum dögum vegna þeirrar kröfu sem uppi er í flokknum að hún láti lítið á sér bera eftir að hún neyddist til að segja af sér sem ráðherra í kjölfar lekamálsins, að í hennar huga teldi hún sig ekki þurfa frekari ,,pólitíska kælingu\". Hún væri þó heldur ekki persónulega á þeim stað að sækjast sérstaklega eftir frekari pólitískum átökum eftir það sem á undan væri gengið. Sagði í fréttaskýringunni að viðbúið væri að Hönnu Birnu myndu bíða nöturleg skilaboð  á Landsfundi ef hún héldi því til streitu að bjóða sig fram.

Heimildir Hringbrautar herma að eftir því sem fleiri skori opinberlega á Ólöfu verði að teljast æ ólíklegra að Hanna Birna taki slaginn. Síðast fékk hún 97% stuðning til embættis varaformanns á Landsfundi og einnig töluverðan stuðning í formannsembætti flokksins.