Ólöf Nordal, innanríkisráðherra segir að krabbameinsmeðferðin sem hún undirgekkst fyrir skömmu hafi gengið vel og að hún sé nú búin að ná fyrra starfsþreki.
Þetta kom fram í einkar persónulegu og yfirgripsmiklu samtali sem Páll Magnússon átti við Ólöfu í þættinum Þjóðbraut á Hringbraut í gærkvöld, en ráðherrann sem var óvænt valinn í ríkisstjórnina í stað Hönnu Birnu Kristjánsdóttur sem varð að segja af sér seint á síðasta ári fór mjög víða í viðtalinu og talaði þar skýrt og ákveðið um mörg pólitísk álitamál á hennar borði.
Ólöf Nordal segist ekki vera í hópi þeirra sem vilja endurskoða aðild Íslands að Schengen-samstarfinu. Og hún vill Reykjavíkurflugvöll áfram á sínum stað: \"Það verður ekki byggt í fluglínu neinnar flugbrautar á Reykjavíkurflugvelli nema að sérstök ákvörðun verði tekin um slíkt og þannig ákvörðun hefur ekki verið tekin,\" sagði hún meðal annars í viðtalinu sem hægt er að nálgast á hringbraut.is eins og allt annað efni sjónvarpsstöðvarinnar.
Þjóðbraut er frumsýnd í haust og vetur klukkan 21:00 á miðvikudagskvöldum.
