Fulltrúaráð sjálfstæðisfélaganna og sjálfstæðisfélögin á Seltjarnarnesi hvetja Ólöfu Nordal, innanríkisráðherra, til að gefa kost á sér til embættis varaformanns Sjálfstæðisflokksins.
Fyrr í þessum mánuði hvatti Sjálfstæðisfélagið í Langholtshverfi Ólöfu til að gefa kost á sér. Heimildir Hringbrautar herma að verið sé að kanna hug fleiri hverfafélaga í þessum efnum á höfuðborgarsvæðinu.
Hanna Birna Kristjánsdóttir, sem er varaformaður flokksins, sagði af sér eftir lekamálið svokallaða. Hún er nú formaður utanríkismálanefndar. Hanna Birna hefur sagt að, að óbreyttu, muni hún sækjast eftir endurkjöri á landsfundi, en samkvæmt nýlegum fréttum hér á Hringbraut fara líkur á því minnkandi.
Eins og staðan er núna eru því mestar líkur á að Ólöf verði ein í kjöri, en nær öruggt er talið að hún fari fram, verði hún ein í kjöri.
