Ólöf Nordal er ekki rétti frambjóðandinn sem næsti varaformaður Sjálfstæðisflokksins að mati hluta þeirra sjálfstæðismanna sem helst segjast hampa kristnum gildum í skrifum sínum.
Þannig segir Jón Valur Jensson guðfræðingur í bloggpistli að Ólöf sé ekki „óskakandídat kristinna sjálfstæðismanna eftir að hún tók það frumkvæði innan síns flokks að tala gegn samvizkufrelsi kenningartrúrra Þjóðkirkjupresta.“
Hann segir að hvorki verði það kallað stuðningur við „fölskvalausan kristindóm né við það frelsi sem svo oft er í hávegum haft í hátíðarræðum í Sjálfstæðisflokknum“.
Guðfræðingurinn telur að trúleysingjar og andstæðingar þjóðkirkjunnar hafi farið offari gegn kirkjunni og nefnir í þann hóp Eyjuna, Fréttablaðið, 365 miðla og Rúv. „Hafa þessir fjölmiðlar magnað upp þrýstistarfsemi um þetta mál, þar til innanríkisráðfrúin sprakk á limminu. Hún hafði áður (á Alþingi) viljað samvizkufrelsi fyrir presta [eins og t.d. læknar njóta um sum verk], en nú er hún sem leiðitamur kálfur í bandi vinstri manna og jafnvel trúlítilla. Ekki er þá gæfulegt að hafa hana yfir kirkjumálunum og heldur ekki sem varaformann flokksins.“
