Ólína Þorvarðardóttir, fyrrverandi þingkona Samfylkingarinnar, undrast orð Þórólf Guðnasonar, sóttvarnalæknis, frá því í gær á blaðamannafundi almannavarna, um kórónaveiruna svokölluðu. Hún segir lítið stoða að gera lítið úr vandanum.
„Þannig að ég held, að ef allt færi á versta veg og ekkert væri gert, þá myndum við ráða við það,“ sagði Þórólfur. Hann sagði að talið væri að einkennalaust fólk sem væri smitað en ekki veikt, gæti ekki smitað aðra af veirunni. Hann hefur áður sagt að veiran muni berast hingað til lands, fyrr eða síðar.
Ólína undrast fullvissu læknisins. Segir til lítils að halda fram ósannindum, þó hún skilji að ekki megi valda hysteríu í samfélaginu.
„Ég virði alveg viðleitni yfirvalda til þess að róa mannskapinn og komast hjá hysteríu — en ég finn samt að það þykknar aðeins í mér þegar einhverju er haldið fram sem fær illa staðist. Þetta er nýr sjúkdómur. Við vitum sáralítið annað en það að engin lækning er til og ekkert bóluefni enn sem komið er. Sóttin breiðist hratt út um heiminn. Eina ráðið sem við höfum er varfærni, smitgát og hreinlæti. Það hjálpar okkur ekki núna að gera lítið úr vandanum eða vekja falskar væntingar um stöðu og framtíðarhorfur.“
Þá gagnrýnir hún orð Þórólfs um svínaflensuna og að hann skuli bera kórónaveiruna saman við svíanflensuna. Það sé ekki samanburðarhæft.
„Nú er ég undrandi á ummælum sóttavarnarlæknis. Hann segir um Covid19 veiruna að hún muni verða vel viðráðanleg berist hún til landsins, og bætir við að „svipaður faraldur hafi komið upp í svínainflúensunni 2009. Það hafi verið mikið álag en allt hafi tekist.“ Hvernig er hægt að bera þetta tvennt saman? Í svínainflúensunni var hægt að gefa lyf (Tamiflu og Relenza) til að vinna bug á veirunni.
Nú eru engin lyf og engar bólusetningar í boði. Svínainflúensan fór vissulega víða en dánartíðni hennar var ekki nema 0,01-0,08%. Dánartíðni Covid19 veirunnar er margfalt meiri, virðist vera 2-4%. Lægst er dánartíðnin meðal hrausts fólks á besta aldri (innan við 1%) en meðal þeirra sem komnir eru yfir sextugt hækkar hún í 19%. Það þýðir fimmti hver einstaklingur yfir sextugu sem sýkist af veirunni. Fimmti hver.“
